២៣ មិថុនា ២០២៣
នាព្រឹកថ្ងៃសុក្រ ៦កើត ខែបឋមាសាឍ ឆ្នាំថោះ ព.ស.២៥៦៧ ត្រូវនឹងថ្ងៃទី២៣ ខែមិថុនា ឆ្នាំ២០២៣ ឯកឧត្តម ស៊ុំ សន្និសិទ្ធ ទេសាភិបាលរង ធនាគារជាតិនៃកម្ពុជា តំណាងដ៏ខ្ពង់ខ្ពស់របស់ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានអនុញ្ញាតឱ្យលោក Philip Dongsoo Hong មន្រ្តីជាន់ខ្ពស់ផ្នែកទំនាក់ទំនង (Client Engagement Manager) ទទួលបន្ទុកកម្មវិធីសហប្រតិបត្តិការជំនួយប្រឹក្សាផ្នែកគ្រប់គ្រងការវិនិយោគ ( RAMP Program) របស់ធនាគារពិភពលោក ចូលជួបសម្តែងការគួរសម និងណែនាំលោក Stephane Piot ដែលជាមន្រ្តីជាន់ខ្ពស់ផ្នែកទំនាក់ទំនងថ្មីដែលនឹងមកជំនួសតួនាទីរបស់លោក។
លោក Philip Dongsoo Hong បានកោតសរសើរ អំពីវឌ្ឍនភាពនៃការគ្រប់គ្រងទុនបម្រុងអន្តរជាតិរបស់ធនាគារជាតិនៃកម្ពុជា ដោយក្រុមការងារគ្រប់គ្រងទុនបម្រុងអន្តរជាតិរបស់ធនាគារជាតិនៃកម្ពុជាមានសមត្ថភាព និងគុណវុឌ្ឍិជំនាញខ្ពស់ ហើយប្រតិបត្តិការវិនិយោគត្រូវបានបំពាក់នូវប្រព័ន្ធគ្រប់គ្រងការវិនិយោគទំនើប និងមានសុវត្ថិភាពខ្ពស់សម្រាប់បម្រើឱ្យប្រតិបត្តិការជួញដូរ គ្រប់គ្រងហានិភ័យ ការទូទាត់ និងចុះកិច្ចបញ្ជិកា ស្របបានតាមកម្រិតស្តង់ដារអន្តរជាតិនៃការគ្រប់គ្រងទុនបម្រុងវិនិយោគរបស់ធនាគារកណ្តាល។ វឌ្ឍនភាពទាំងនេះបានធ្វើឱ្យធនាគារជាតិនៃកម្ពុជា ក្លាយជាសមាជិកគំរូក្នុងចំណោមសមាជិកចំនួន ៧០ស្ថាប័ន នៃកម្មវិធីសហប្រតិបត្តិការជំនួយប្រឹក្សាផ្នែកគ្រប់គ្រងការវិនិយោគ (RAMP Program) របស់ធនាគារពិភពលោក។
ឯកឧត្តម ទេសាភិបាលរង បានថ្លែងអំណរគុណចំពោះធនាគារពិភពលោក ក្រុមការងារជំនាញ ជាពិសេស លោក Philip Dongsoo Hong ដែលបានបំពេញតួនាទីជាមន្រ្តីជាន់ខ្ពស់ផ្នែកទំនាក់ទំនងសម្រាប់ធនាគារជាតិនៃកម្ពុជា អស់រយៈពេល ៧ឆ្នាំមកនេះ និងបានខិតខំប្រឹងប្រែងជួយជ្រោមជ្រែងការអភិវឌ្ឍការងារគ្រប់គ្រងទុនបម្រុងវិនិយោគ និងធនធានមន្រ្តីគ្រប់គ្រងទុនបម្រុងវិនិយោគរបស់ធនាគារជាតិនៃកម្ពុជា។ ឯកឧត្តម ស្នើធនាគារពិភពលោកបន្តសហការជួយជ្រោមជ្រែងធនាគារជាតិនៃកម្ពុជាបន្ថែមទៀត ដើម្បីឱ្យការគ្រប់គ្រងទុនបម្រុងអន្តរជាតិរបស់ធនាគារជាតិនៃកម្ពុជាកាន់តែមានការរីកចម្រើន និងជឿនលឿន។
គួររំលេចថា កម្មវិធី RAMP របស់ធនាគារពិភពលោកគឺជាកម្មវិធីបណ្តុះបណ្តាលធនធានមនុស្សផ្នែកគ្រប់គ្រងទុនបម្រុងអន្តរជាតិ ហើយធនាគារជាតិនៃកម្ពុជាបានចូលជាសមាជិករបស់កម្មវិធី RAMP ចាប់ពីឆ្នាំ២០០៨មក។ កម្មវិធីនេះផ្តល់វគ្គបណ្តុះបណ្តាលបច្ចេកទេសសំខាន់ៗដល់ក្រុមការងារគ្រប់គ្រងទុនបម្រុងវិនិយោគរបស់ធនាគារជាតិនៃកម្ពុជា ដូចជា ការចូលរួមសិក្ខាសាលាអំពីការងារគ្រប់គ្រងទុនបម្រុងវិនិយោគ ការណែនាំដោយផ្ទាល់ពីអ្នកជំនាញរបស់ធនាគារពិភពលោក និងអាហារូបករណ៍សម្រាប់ការសិក្សាសញ្ញាប័ត្រជំនាញ CFA ជាដើម។
