០២ ឧសភា ២០១៧
កាលពីថ្ងៃទី២ ខែឧសភា ឆ្នាំ ២០១៧ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានអនុញ្ញាតឱ្យក្រុមបេសកកម្មមូលនិធិរូបិយវត្ថុអន្តរជាតិ (IMF) ដែលដឹកនាំដោយលោក Jarkko Turunen ប្រធានក្រុមបេសកកម្មថ្មីរបស់ IMF សម្រាប់កម្ពុជា ដែលមកបំពេញទស្សនកិច្ចនៅកម្ពុជាចាប់ពីថ្ងៃទី២-៤ ខែឧសភា ឆ្នាំ២០១៧។ បេសកកម្មនេះមានគោលបំណងតាមដានវឌ្ឍនភាពស្ថានភាពសេដ្ឋកិច្ច និងវិស័យហិរញ្ញវត្ថុកម្ពុជា ចាប់តាំងពីទស្សនកិច្ចកាលពីឆ្នាំ២០១៦ ស្តីពីមាត្រាទី៤ (Article IV) ហើយក៏ជាឱកាសសម្រាប់ឱ្យ ប្រធានក្រុមបេសកកម្មថ្មី បានជួបនឹងអាជ្ញាធរពាក់ព័ន្ធផងដែរ។
ឯកឧត្តម ទេសាភិបាល បានជម្រាបជូនក្រុមបេសកកម្មថា ស្ថិរភាពនយោបាយនិងសុខសន្តិភាពនៅកម្ពុជា មានសារៈសំខាន់មិនអាចខ្វះបានចំពោះការរីកចម្រើនសកម្មភាពសេដ្ឋកិច្ចនិងទស្សវិស័យវិជ្ជមានរបស់វិស័យឯកជន។ កត្តាទាំងនេះហើយដែលធ្វើឱ្យកម្ពុជាសម្រេចបានអត្រាកំណើនសេដ្ឋកិច្ចខ្ពស់រឹងមាំនារយៈពេលជាងពីរទសវត្សរ៍ចុងក្រោយនេះ។ នៅឆ្នាំ២០១៧ នេះ កម្ពុជារំពឹងថានឹងទទួលបានកំណើនសេដ្ឋកិច្ចរឹងមាំក្នុងអត្រា ៧% ជាមួយនឹងស្ថិរភាពម៉ាក្រូសេដ្ឋកិច្ចល្អប្រសើរដោយអត្រាអតិផរណាមានកម្រិតទាបជាង ៥% និងស្ថិរភាពតម្លៃប្រាក់រៀល។ នៅក្នុងវិស័យធនាគារ អន្តរការីយកម្មហិរញ្ញវត្ថុបានដើតួនាទីស្នូលក្នុងការគាំទ្រការរីកចម្រើនសកម្មភាពសេដ្ឋកិច្ច តាមរយៈការកៀរគរមូលនិធិយកទៅវិនិយោគក្នុងវិស័យសេដ្ឋកិច្ចចម្បងៗ។ បច្ចុប្បន្ន អត្រាកំណើនឥណទានបានថយចុះសន្សឹមៗទៅក្នុងអត្រាសមស្រប (១៧,៦% នៅខែកុម្ភៈ ឆ្នាំ២០១៧) រួមចំណែកធ្វើឱ្យឥណទានបន្តមានគុណភាពល្អប្រសើរ។ វិស័យហិរញ្ញវត្ថុបន្តចាក់ឫសកាន់តែស៊ីជម្រៅនៅក្នុងសេដ្ឋកិច្ចដោយភាពស៊ីជម្រៅផ្នែកហិរញ្ញវត្ថុ (M2/GDP) និងឥណទានរបស់គ្រឹះស្ថានធនាគារនិងមីក្រូហិរញ្ញវត្ថុធៀបនឹងផ.ស.ស (Credit/GDP) បន្តកើនឡើងជាលំដាប់ដល់ ៧២% និង ៨៧%។ វឌ្ឍនភាពវិស័យធនាគារប្រកបដោយស្ថិរភាពបានរួមចំណែកក្នុងការរក្សាស្ថិរភាពហិរញ្ញវត្ថុនិងលើកកម្ពស់បរិយាប័ន្នហិរញ្ញវត្ថុដល់អត្រាប្រមាណ ៥២% (អត្រាប្រជាជនពេញវ័យកំពុងប្រើប្រាស់សេវាហិរញ្ញវត្ថុធៀបនឹងប្រជាជនពេញវ័យសរុប)។
ឯកឧត្តម ទេសាភិបាល បានជម្រាបជូនភ្ញៀវផងដែរពីប្រវត្តិរូបិយវត្ថុកម្ពុជា និងការឆ្លងកាត់ដំណាក់កាលនានានៃប្រវត្តិសាស្ត្រ ជាពិសេសសង្គ្រាមស៊ីវិល ដែលបានអូសបន្លាយអស់រយៈពេល ៣០ ឆ្នាំ ដែលក្នុងនោះ របបប៉ុល ពត បានកម្ទេចរាល់ហេដ្ឋារចនាសម្ព័ន្ធសេដ្ឋកិច្ចនិងសង្គម រួមទាំងបំផ្លាញអគារធនាគារជាតិនៃកម្ពុជា និងលុបបំបាត់ការប្រើប្រាស់រូបិយវត្ថុជាតិផងដែរ។
លោក Jarkko Turunen និងក្រុមបេសកកម្មក៏បានសម្តែងការកោតសរសើរចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលអនុវត្តគោលនយោបាយអភិវឌ្ឍសេដ្ឋកិច្ចប្រកបដោយប្រសិទ្ធភាព។ លោកក៏បានវាយតម្លៃខ្ពស់ចំពោះធនាគារជាតិនៃកម្ពុជា ដែលបានអភិវឌ្ឍវិស័យធនាគារ ប្រកបដោយភាពរឹងមាំ និងបានគ្រប់គ្រងហានិភ័យក្នុងវិស័យធនាគារបានយ៉ាងល្អប្រសើរ ជាមួយនឹងវិធានការម៉ាក្រូនិងមីក្រូប្រុងប្រយ័ត្ន និងការត្រួតពិនិត្យធនាគារ។ លោកបានបង្ហាញពីសុទិដ្ឋិនិយមខ្ពស់ចំពោះការបន្តរីកចម្រើនវិស័យធនាគារ ក៏ដូចជាសេដ្ឋកិច្ចកម្ពុជា នារយៈពេលមធ្យម។ តាងនាមមូលនិធិរូបិយវត្ថុអន្តរជាតិ លោកក៏បានសម្តែងការគាំទ្រយ៉ាងពេញទំហឹងរបស់មូលនិធិរូបិយវត្ថុដល់ដំណើរការអភិវឌ្ឍកម្ពុជា តាមរយៈ ការផ្តល់ជំនួយបច្ចេកទេស ដើម្បីពង្រឹងសមត្ថភាពស្ថាប័ននិងមន្ត្រីជំនាញ និងជួយតាមដានលើវឌ្ឍនភាពនិងបញ្ហាប្រឈមរបស់សេដ្ឋកិច្ចកម្ពុជា ដើម្បីរួមចំណែកបន្តជំរុញកំណើនប្រកបដោយចីរភាពនិងបរិយាប័ន្ន។
