១៧ មីនា ២០២១
នៅថ្ងៃពុធ ៤កើត ខែចេត្រ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៧ ខែមីនា ឆ្នាំ២០២១ លោកជំទាវ អ៊ុក ម៉ាលី ទេសាភិបាលរងធនាគារជាតិនៃកម្ពុជា បានអញ្ជើញចូលរួមក្នុងកិច្ចប្រជុំអនុគណៈកម្មការវិស័យឯកជនតាមរយៈប្រព័ន្ធអនឡាញ ស្តីពីការអនុវត្តកម្មវិធីឆ្លើយតបនឹងការរីករាលដាលនៃជំងឺកូវីដ-១៩ និងការស្តារសម្បទាសេដ្ឋកិច្ចឡើងវិញ (COVID-19 Active Response and Expenditure Support Program- CARES)។ កិច្ចប្រជុំនេះ ត្រូវបានសហការរៀបចំដោយក្រសួងសេដ្ឋកិច្ច និងហិរញ្ញវត្ថុ និងធនាគារអភិវឌ្ឍន៍អាស៊ី (ADB) ក្នុងគោលបំណងតាមដាននិងចែករំលែកព័ត៌មាននៃការអនុវត្តកម្មវិធី CARES។ កម្មវិធី CARES គឺជាកិច្ចព្រមព្រៀងឥណទានសម្បទានរវាងរាជរដ្ឋាភិបាលកម្ពុជា និង ADB ក្រោមរូបភាពជាកម្ចីសម្បទានចំនួន ២៥០ លានដុល្លារអាមេរិក និងភ្ជាប់ជាមួយទឹកប្រាក់ក្រោមរូបភាពជាជំនួយបច្ចេកទេសដែលរួមបញ្ចូលកិច្ចគាំទ្រផ្នែកប្រឹក្សាផ្សេងទៀត។ កម្មវិធីនេះបានចែកជាសសរស្តម្ភ ៣ រួមមាន៖ i/- វិធានការសុខភាពដើម្បីប្រឆាំងនឹងការរីករាលដាលនៃជំងឺកូវីដ-១៩ ii/- ជំនួយសង្គមដើម្បីបង្ការការកើនឡើងនៃភាពក្រីក្រ និង iii/- ការគាំទ្រដល់ការងើបឡើងវិញនៃសេដ្ឋកិច្ច (រួមមាន ឧបត្ថម្ភធនប្រាក់ឈ្នួលដល់កម្មកររោងចក្រ និងបុគ្គលិកវិស័យទេសចរណ៍, កម្ចីគាំទ្រដល់សហគ្រាសធុនតូច និងមធ្យម, ការបណ្តុះបណ្តាលជំនាញ និងសេវាកម្មការងារ)។
