២៤ កុម្ភៈ ២០២១
នៅថ្ងៃពុធ ១៣កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៤ ខែកុម្ភៈ ឆ្នាំ២០២១ ឯកឧត្តម រ័ត្ន សុវណ្ណនរៈ អគ្គនាយកត្រួតពិនិត្យ និងជាតំណាងដ៏ខ្ពង់ខ្ពស់របស់ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានចូលរួមចុះហត្ថលេខាលើអនុស្សរណៈយោគយល់គ្នា ជាមួយ សាជីវកម្មហិរញ្ញវត្ថុអន្តរជាតិ ក្នុងការអនុវត្តគម្រោង ស្តីពី “ការអភិវឌ្ឍទីផ្សារខ្សែចង្វាក់ផ្គត់ផ្គង់ហិរញ្ញវត្ថុ” ដើម្បីគាំទ្ររាជរដ្ឋាភិបាលកម្ពុជាក្នុងការជំរុញការអភិវឌ្ឍវិស័យឯកជន។ ដោយទទួលស្គាល់ពីសារៈសំខាន់នៃសហគ្រាសធុនតូចនិងមធ្យម ក្នុងការចូលរួមជំរុញកំណើនសេដ្ឋកិច្ចជាតិ គម្រោងនេះ មានទិសដៅស្របគ្នាទៅនឹងសកម្មភាពអាទិភាពនៃយុទ្ធសាស្ត្រជាតិស្តីពីបរិយាបន្នហិរញ្ញវត្ថុឆ្នាំ២០១៩-២០២៥ ក្នុងការលើកកម្ពស់ផលិតផលឥណទានសម្រាប់សហគ្រាសធុនតូចនិងមធ្យម។ លទ្ធផលនៃគម្រោងនេះ នឹងក្លាយទៅជាឯកសារចង្អុលផ្លូវសម្រាប់ការរៀបចំគោលនយោបាយ និងអភិវឌ្ឍប្រព័ន្ធអេកូឡូស៊ីហិរញ្ញប្បទានធុនតូចនិងមធ្យមនៅកម្ពុជា តាមរយៈការពង្រឹងការគាំទ្រផ្នែកបទប្បញ្ញត្តិ ការបង្កើនចំណេះដឹងនិងការអនុវត្តទីផ្សារ និងការរៀបចំប្រព័ន្ធអេកូឡូស៊ីដែលមានលក្ខណៈអំណោយផល។
