២៩ ធ្នូ ២០២០
នៅថ្ងៃអង្គារ ១៥កើត ខែបុស្ស ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៩ ខែធ្នូ ឆ្នាំ២០២០ លោកជំទាវ នាវ ច័ន្ទថាណា ទេសាភិបាលរង ធនាគារជាតិនៃកម្ពុជា បានអនុញ្ញាតឱ្យ លោក Chow Ying Hoong នាយកប្រតិបត្តិ និងជាសហប្រធានធនាគារ Sumitomo Mitsui Banking Corporation (SMBC) ប្រចាំការិយាល័យតំបន់អាស៊ីប៉ាស៊ីហ្វិក និងសហការី ជួបពិភាក្សាការងារតាមប្រព័ន្ធអនឡាញ។ នៅក្នុងកិច្ចប្រជុំនេះ លោក Chow Ying Hoong បានរាយការណ៍ពីវឌ្ឍនភាពការងាររបស់ធនាគារ SMBC ដែលបានបើកការិយាល័យតំណាងជាផ្លូវការនៅកម្ពុជាចាប់ពីឆ្នាំ២០១២ និងលើកឡើងពីផែនការអាជីវកម្មនាពេលអនាគត ព្រមទាំងបានចែករំលែកពីបទពិសោធន៍ការងាររបស់ធនាគារដែលផ្តោតលើហិរញ្ញប្បទានបៃតង និងយន្តការការពារប្រាក់បញ្ញើ ជាដើម។ នាឱកាសនោះ លោកជំទាវ ទេសាភិបាលរង បានកោតសរសើរពីវឌ្ឍនភាពនិងផែនការវិនិយោគរបស់ធនាគារ SMBC នៅប្រទេសកម្ពុជា ជាពិសេសការរួមចំណែកក្នុងការអភិវឌ្ឍវិស័យហិរញ្ញវត្ថុនៅកម្ពុជា។
