២៨ កញ្ញា ២០២០
នៅថ្ងៃចន្ទ ១១កើត ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៨ ខែកញ្ញា ឆ្នាំ២០២០ ធនាគារជាតិនៃកម្ពុជាបានរៀបចំទិវាប្រាក់រៀល ខួបលើកទី៤០នៃការដាក់ឱ្យចរាចរប្រាក់រៀលឡើងវិញ (២០ មីនា ១៩៨០ - ២០ មីនា ២០២០) នៅសណ្ឋាគារសូហ្វីតែលភ្នំពេញភូគីត្រា ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា និងមានការអញ្ជើញចូលរួមពីថ្នាក់ដឹកនាំតំណាងក្រសួង-ស្ថាប័ននានា ក៏ដូចជាវិស័យឯកជនប្រមាណ ២០០ រូប។ ពិធីអបអរសាទរទិវាប្រាក់រៀលក៏ត្រូវបានធ្វើឡើងផងដែរនៅផ្សារទំនើបអ៊ីអនម៉ល ១ ដែលមានសាធារណជនចូលរួម ប្រមាណ ១.៥០០រូប។ កម្មវិធីទាំងពីរខាងលើ ត្រូវបានពន្យាពេលតាំងពីថ្ងៃទី២០ ខែមីនា ឆ្នាំ២០២០ ដោយសារការបង្ការការរីករាលដាលជំងឺកូវីដ១៩។
នៅក្នុងកម្មវិធីទាំងពីរខាងលើ អ្នកចូលរួមទទួលបាននូវព័ត៌មាននិងចំណេះដឹងពាក់ព័ន្ធនឹងប្រវត្តិនៃរូបិយវត្ថុជាតិខ្មែរ ព្រមទាំងការរីកចម្រើនប្រព័ន្ធធនាគារនិងរូបិយវត្ថុ ក្នុងរយៈពេល ៤០ ឆ្នាំចុងក្រោយនេះ តាមរយៈសុន្ទរកឋារបស់ ឯកឧត្តម ទេសាភិបាល បទអន្តរគន៍របស់អ្នកស្រាវជ្រាវរបស់មជ្ឈមណ្ឌលស្រាវជ្រាវរបស់ភ្នាក់ងារសហប្រតិបត្តិការអន្តរជាតិជប៉ុន (JICA) និងតំណាងពីវិស័យឯកជន វីដេអូខ្ញុំស្រឡាញ់ប្រាក់រៀល 2.០ និង វីដេអូពីដំណើរឈានទៅប្រសិទ្ធភាពប្រព័ន្ធធនាគារនិងរូបិយវត្ថុ ដែលផលិតដោយធនាគារជាតិនៃកម្ពុជា ការតាំងពិព័រណ៌ប្រវត្តិរូបិយវត្ថុ ការលេងល្បែងល្បងប្រាជ្ញានិងឆ្លើយសំណួរយករង្វាន់ ជាដើម។
