២៣ កញ្ញា ២០២០
នៅរសៀលថ្ងៃពុធ ៦កើត ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៣ ខែកញ្ញា ឆ្នាំ២០២០ លោកជំទាវ ជា សិរី ឧបការីទេសាភិបាល និងជាអគ្គនាយកបច្ចេកទេស ធនាគារជាតិនៃកម្ពុជា ត្រូវបានមជ្ឈមណ្ឌល Tsinghua Southeast Asia Center អញ្ជើញឱ្យចូលរួមធ្វើបទបង្ហាញស្តីពី “គោលដៅអភិវឌ្ឍន៍ប្រកបដោយចីរភាព និងតួនាទីរបស់ធនាគារកណ្តាល” នៅក្នុងវេទិកា RICH 70 Tsinghua Southeast Asia Cloud Forum។ នៅក្នុងថ្ងៃដដែលនេះដែរ លោកជំទាវក៏ត្រូវបានវេទិកាសេដ្ឋកិច្ចពិភពលោក (World Economic Forum) អញ្ជើញឱ្យចូលរួមធ្វើអ្នកសម្របសម្រួលក្នុងកិច្ចប្រជុំកំពូលសម្រាប់អភិវឌ្ឍន៍ប្រកបដោយចីរភាព ដោយផ្តោតលើប្រធានបទស្តីពី “ប្រព័ន្ធទូទាត់អេឡិចត្រូនិកនិងឌីជីថល ក្នុងការលើកកម្ពស់បរិយាបន្នហិរញ្ញវត្ថុ និងកាត់បន្ថយភាពក្រីក្រ”។ គួរបញ្ជាក់ថា វេទិកាទាំងពីរនេះ មានការចូលរួមពីថ្នាក់ដឹកនាំកំពូល រដ្ឋមន្ត្រី អនុរដ្ឋមន្ត្រី រួមទាំងឥស្សរជនការទូតនៃបណ្តាប្រទេសជាច្រើនជុំវិញពិភពលោក។
