២២ កញ្ញា ២០២០
កាលពីថ្ងៃអង្គារ ៥កើត ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២២ ខែកញ្ញា ឆ្នាំ២០២០ លោកជំទាវ នាវ ច័ន្ទថាណា ទេសាភិបាលរង ធនាគារជាតិនៃកម្ពុជា បានអនុញ្ញាតឱ្យ លោក Yasuhisa Ojima តំណាងមូលនិធិរូបិយវត្ថុអន្តរជាតិប្រចាំប្រទេសកម្ពុជា ចូលជួបសម្តែងការគួរសម និងពិភាក្សាការងារនៅធនាគារជាតិនៃកម្ពុជា។ នៅក្នុងជំនួបនេះ លោកជំទាវ បានជម្រាបជូនពីវឌ្ឍនភាពសេដ្ឋកិច្ច ប្រព័ន្ធធនាគារនៅកម្ពុជា និងវិធានការក្នុងវិស័យធនាគារឆ្លើយតបទៅនឹងការរីករាលដាលនៃជំងឺកូវីដ១៩ ព្រមទាំងថ្លែងអំណរគុណចំពោះការចូលរួមរបស់មូលនិធិរូបិយវត្ថុអន្តរជាតិក្នុងការអភិវឌ្ឍវិស័យធនាគារ ការផ្តល់ជំនួយបច្ចេកទេស អាហារូបករណ៍ និងវគ្គបណ្តុះបណ្តាលសម្រាប់កសាងធនធានមនុស្សនៅធនាគារជាតិនៃកម្ពុជា។
