១៤ កញ្ញា ២០២០
កាលពីថ្ងៃចន្ទ ១២រោច និង ថ្ងៃអង្គារ ១៣រោច ខែភទ្របទ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី១៤-១៥ ខែកញ្ញា ឆ្នាំ២០២០ ឯកឧត្តម ស៊ុំ សន្និសិទ្ធ ទេសាភិបាលរង ធនាគារជាតិនៃកម្ពុជា បានដឹកនាំក្រុមការងារ ចូលរួមសិក្ខាសាលាជាន់ខ្ពស់ដែលសហការរៀបចំរួមគ្នារវាង មជ្ឍមណ្ឌលស្រាវជ្រាវនិងបណ្តុះបណ្តាលធនាគារកណ្តាលអាស៊ីអាគ្នេយ៍ (SEACEN) និង ធនាគារសម្រាប់ការទូទាត់អន្តរជាតិ (BIS) និងកិច្ចប្រជុំគណៈកម្មាធិការនាយកប្រតិបត្តិ SEACEN លើកទី១៩ តាមរយៈប្រព័ន្ធអ៊ីធឺណែត ។ សិក្ខាសាលានិងកិច្ចប្រជុំនេះត្រូវបានដឹកនាំដោយអាជ្ញាធររូបិយវត្ថុសិង្ហបូរីដែលជាប្រធានក្នុងអាណត្តិនេះ និងមានការចូលរួមពីសំណាក់ទេសាភិបាលរងធនាគារកណ្តាលនិងអាជ្ញាធររូបិយវត្ថុដទៃទៀតដែលជាសមាជិកមជ្ឈមណ្ឌលស៊ាសិន ព្រមទាំងតំណាងមកពីធនាគារសម្រាប់ការទូទាត់អន្តរជាតិ (BIS) និងមូលនិធិរូបិយវត្ថុអន្តរជាតិ (IMF) ជាច្រើនរូបទៀត។ សិក្ខាសាលាជាន់ខ្ពស់ បានពិភាក្សា និងចែករំលែកទស្សនវិស័យ អំពី ស្ថានភាពក្រោយការរីករាលដាលជំងឺជាសកល និងស្ថានភាពប្រក្រតីថ្មី (new normal) បន្ទាប់ពីវិបត្តិជំងឺកូវីដ១៩។ ស្ថានភាពអាសន្ននៃសុខភាពសាធារណៈពិភពលោកបានធ្វើឱ្យសេដ្ឋកិច្ចពិភពលោកធ្លាក់ចុះយ៉ាងធ្ងន់ធ្ងរ ដែលមិនធ្លាប់មានក្នុងប៉ុន្មានទសវត្សកន្លងមកនេះ។ រដ្ឋាភិបាលនិងធនាគារកណ្តាលបានចាត់វិធានការយ៉ាងឆាប់រហ័សម៉ឺងម៉ាត់និងមិនធ្លាប់មានពីមុនមក ដើម្បីកាត់បន្ថយផលប៉ះពាល់សេដ្ឋកិច្ចនិងរក្សាស្ថិរភាពប្រព័ន្ធហិរញ្ញវត្ថុ។ ជាមួយគ្នានេះដែរ ជំងឺរាតត្បាតកូវីដ១៩ បានជំរុញការអភិវឌ្ឍបច្ចេកវិទ្យាឌីជីថលក្នុងវិស័យជាច្រើនរាប់បញ្ចូលទាំង វិស័យធនាគារនិងការទូទាត់ផងដែរ។ ខណៈពេល ការរីករាលដាលនៃជំងឺនេះនៅមានភាពស្រពិចស្រពិលនៅឡើយ ថានឹងត្រូវបញ្ចប់នៅពេលណា ការផ្លាស់ប្តូរជាលក្ខណៈរចនាសម្ព័ន្ធអាចកើតមានចំពោះវិស័យពាណិជ្ជកម្ម សេដ្ឋកិច្ច និង ហិរញ្ញវត្ថុ។ទន្ទឹមនេះ កិច្ចប្រជុំគណៈកម្មាធិការនាយកប្រតិបត្តិ SEACEN លើកទី១៩ ត្រូវបានរៀបចំឡើងដើម្បីពិនិត្យមើលពីលទ្ធផលការងារក្នុងឆ្នាំ២០១៩ និងទិសដៅការងារឆ្នាំ២០២០ របស់មជ្ឈមណ្ឌលស៊ាសិន។ ធនាគារជាតិនៃកម្ពុជា ដែលជាសមាជិកដ៏សកម្មមួយរបស់មជ្ឈមណ្ឌលស៊ាសិនបានទទួលនូវការជួយពង្រឹងសមត្ថភាពជំនាញធនាគារកណ្តាលពីមជ្ឈមណ្ឌលស៊ាសិន និងបានរួមចំណែកធ្វើជាម្ចាស់ផ្ទះរៀបចំវគ្គបណ្តុះបណ្តាលស៊ាសិនផងដែរ។ ជារួម អង្គប្រជុំ គាំទ្រការធ្វើកំណែទម្រង់ការងាររបស់ស៊ាសិនក្នុងឆ្នាំ២០២០ និងបានអនុម័តលើការពង្រឹងតួនាទីរបស់ស៊ាសិនក្នុងការផ្តល់ការបណ្តុះបណ្តាល ការស្រាវជ្រាវ និងពង្រឹងសមត្ថភាពជំនាញនានាតាមរយៈប្រពន្ធអនឡាញដល់ប្រទេសជាសមាជិក។
