១៨ កុម្ភៈ ២០២០
ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានដឹកនាំគណៈប្រតិភូចូលរួមកិច្ចប្រជុំទ្វេភាគី ជាមួយឯកឧត្តម Veerathai Santiprabhob ទេសាភិបាល ធនាគារកណ្តាលថៃ និងថ្នាក់ដឹកនាំ នៅថ្ងៃអង្គារ ១០រោច ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៨ ខែកុម្ភៈ ឆ្នាំ២០២០ នៅទីក្រុងបាងកក ប្រទេសថៃ។ កិច្ចប្រជុំនេះត្រូវបានរៀបចំឡើងប្រចាំឆ្នាំក្នុងគោលបំណងរឹតចំណងមិត្តភាព និងពង្រឹងកិច្ចសហប្រតិបត្តិការរវាងធនាគារកណ្តាលទាំងពីរ។ កាលពីឆ្នាំកន្លងទៅ ស្ថាប័នទាំងពីរបានបន្តផ្លាស់ប្តូរទស្សនកិច្ច ចែករំលែកបទពិសោធន៍លើការងារជំនាញ និងសហការលើការពង្រីកការតភ្ជាប់ប្រព័ន្ធទូទាត់ ដូចជា ការប្រើប្រាស់ប្រព័ន្ធ QR កូដ សម្រាប់ការផ្ទេរប្រាក់ និងការទូទាត់ឆ្លងព្រំដែនជាប្រាក់រៀលនិងបាតថៃ ដែលគាំទ្រដល់ពាណិជ្ជកម្ម វិនិយោគ និងការផ្ទេរប្រាក់របស់ពលករកម្ពុជា ដែលធ្វើការនៅប្រទេសថៃ។ តាមរយៈកិច្ចសហប្រតិបត្តិការល្អនេះ មន្ត្រីធនាគារជាតិនៃកម្ពុជា ក៏បានទទួលអាហារូបករណ៍ពីធនាគារកណ្តាលថៃ ទៅសិក្សាថ្នាក់ឧត្តមសិក្សានៅប្រទេសថៃ។ ឯកឧត្តម ទេសាភិបាលទាំងពីរបានវាយតម្លៃខ្ពស់ចំពោះវឌ្ឍនភាពនៃកិច្ចសហប្រតិបត្តិការទ្វេភាគីនេះ ដែលបានរួមចំណែកយ៉ាងសំខាន់ដល់ការរីកចម្រើននៃវិស័យធនាគារនិងសេដ្ឋកិច្ចក្នុងប្រទេសទាំងពីរ។ ថ្នាក់ដឹកនាំទាំងពីរក៏បានកំណត់នូវទិសដៅការងារអាទិភាព សម្រាប់សហការរួមគ្នាដើម្បីសម្រេចបាននាពេលខាងមុខទៀត។
