២៥ តុលា ២០១៩
នៅថ្ងៃសុក្រ ១២រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៥ ខែតុលា ឆ្នាំ២០១៩ លោកជំទាវ នាវ ច័ន្ទថាណា ទេសាភិបាលរង ធនាគារជាតិនៃកម្ពុជា និង ឯកឧត្តម Abdul Rasheed Ghaffour ទេសាភិបាលរង ធនាគារកណ្តាលម៉ាឡេស៊ី ដែលជាសហប្រធានកិច្ចប្រជុំគណៈកម្មាធិការជាន់ខ្ពស់អាស៊ាន បានដឹកនាំកិច្ចប្រជុំគណៈកម្មាធិការជាន់ខ្ពស់អាស៊ាន ដែលប្រព្រឹត្តទៅនៅខេត្តសៀមរាប។ កិច្ចប្រជុំនេះមានការចូលរួមពីតំណាងជាន់ខ្ពស់របស់ធនាគារកណ្តាលនៃប្រទេសសមាជិកអាស៊ាន និងសហប្រធាននៃគណៈកម្មាធិការដែលស្ថិតក្រោម SLC និងបានពិភាក្សាលើ i/-ស្ថានភាពម៉ាក្រូសេដ្ឋកិច្ច និងហិរញ្ញវត្ថុក្នុងតំបន់ ii/- គំនិតផ្តួចផ្តើមជាគន្លឹះក្នុងការធ្វើសមាហរណកម្មវិស័យហិរញ្ញវត្ថុ iii/- ភាពធន់ និងប្រព័ន្ធបែងចែងព័ត៌មាន cybersecurity របស់អាស៊ាន និង iv/- តួនាទីរបស់ធនាគារកណ្តាលអាស៊ានក្នុងការលើកកម្ពស់ចីរភាពនៃវិស័យសេដ្ឋកិច្ចនិងហិរញ្ញវត្ថុអាស៊ាន។ កិច្ចប្រជុំនេះក៏មានការចូលរួមធ្វើបទបង្ហាញដោយធនាគារអភិវឌ្ឍន៍អាស៊ី (ADB) និងការិយាល័យស្រាវជ្រាវម៉ាក្រូសេដ្ឋកិច្ចអាស៊ាន (AMRO) លើប្រធានបទស្តីពីហានិភ័យពាក់ព័ន្ធនឹងការប្រែប្រួលអាកាសធាតុនិងបរិដ្ឋាន៖ ឥទ្ធិពលមកលើវិស័យហិរញ្ញវត្ថុនិងតួនាទីរបស់អាជ្ញាធរ និងស្ថានភាពម៉ាក្រូសេដ្ឋកិច្ចនិងហិរញ្ញវត្ថុ។ ជាលទ្ធផល កិច្ចប្រជុំបានពិនិត្យឃើញថា កំណើនសេដ្ឋកិច្ចរបស់តំបន់អាស៊ានមានការថមថយ ដោយសារកត្តាខាងក្រៅមួយចំនួនដូចជា ការចាកចេញរបស់ចក្រភពអង់គ្លេស ជាដើម។ ចំពោះការអនុវត្តការធ្វើសមាហរណកម្មវិស័យហិរញ្ញវត្ថុអាស៊ាន គណៈកម្មាធិការនៃវិស័យនេះភាគច្រើនបានសម្រេចតាមផែនការគោលដៅដែលបានគ្រោងទុកក្នុងរយៈពេលកន្លងមក និងបានកំណត់រួចរាល់ផងដែរនូវការងារអាទិភាពក៏ដូចជាសូចនាករវាស់វែងវឌ្ឍនភាពសម្រាប់ឆ្នាំ២០១៩នេះ។
