០៤ វិចិ្ឆកា ២០១៩
នៅថ្ងៃចន្ទ-អង្គារ ៨-៩កើត ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៤-៥ ខែវិច្ឆិកា ឆ្នាំ២០១៩ លោកជំទាវ នាវ ច័ន្ទថាណា ទេសាភិបាលរង ធនាគារជាតិនៃកម្ពុជា បានដឹកនាំគណៈប្រតិភូអញ្ជើញចូលរួមកិច្ចប្រជុំជាន់ខ្ពស់ផ្នែកហិរញ្ញវត្ថុលើកទី២ រវាងប្រទេសចិន និងប្រទេសសិង្ហបុរី ដែលប្រព្រឹត្តិទៅនៅទីក្រុងឆុងជីង ប្រទេសចិន ក្រោមទស្សនាទាន “ការភ្ជាប់ទំនាក់ទំនងផ្នែកហិរញ្ញវត្ថុជាមួយគំនិតផ្តួចផ្តើមខ្សែក្រវាត់និងផ្លូវ - ការបើកចំហនិងនវានុវត្តផ្នែកហិរញ្ញវត្ថុដើម្បីជំរុញច្រកពាណិជ្ជកម្មអន្តរជាតិថ្មីតាមផ្លូវគោកនិងផ្លូវទឹក។ កិច្ចប្រជុំនេះត្រូវបានរៀបចំឡើងដើម្បីផ្តល់ឱកាសដល់ភាគីពាក់ព័ន្ធពិភាក្សា និងបង្កើនកិច្ចសហប្រតិបត្តិការព្រមទាំងជំរុញទំនាក់ទំនងផ្នែកហិរញ្ញវត្ថុនិងពាណិជ្ជកម្ម ដើម្បីគាំទ្រដល់ការអនុវត្តគំនិតផ្តួចផ្តើមខ្សែក្រវាត់និងផ្លូវ។ ក្នុងពិធីបើកកិច្ចប្រជុំជាន់ខ្ពស់នេះ លោកជំទាវត្រូវបានអញ្ជើញឱ្យចូលរួមថ្លែងសុន្ទរកថា ដែលក្នុងនោះ លោកជំទាវបានលើកឡើងអំពីទំនាក់ទំនងផ្នែកហិរញ្ញវត្ថុនិងសេដ្ឋកិច្ចរវាងប្រទេសកម្ពុជានិងអាស៊ាន ជាមួយសាធារណរដ្ឋប្រជាមានិតចិនក្រោមក្របខ័ណ្ឌគំនិតផ្តួចផ្តើមខ្សែក្រវាត់និងផ្លូវ ដែលបានរួមចំណែកក្នុងការអភិវឌ្ឍសេដ្ឋកិច្ចកម្ពុជានិងអាស៊ាននាពេលកន្លងមក តាមរយៈការអភិវឌ្ឍហេដ្ឋារចនាសម្ព័ន្ធ ដូចជា ផ្លូវ ស្ពាន កំពង់ផែ ផ្លូវរថភ្លើង និងវារីអគ្គិសនី ជាដើម សម្រាប់សម្រួលការធ្វើពាណិជ្ជកម្មក្នុងតំបន់អាស៊ានផង និងរវាងអាស៊ាននិងសាធារណរដ្ឋចិនផងដែរ។ លោកជំទាវ បានបន្ថែមថា កន្លងមកធនាគារជាតិនៃកម្ពុជាក៏បានអនុញ្ញាតឱ្យគ្រឹះស្ថានធនាគារនិងហិរញ្ញវត្ថុមួយចំនួនអាចបើកគណនីជាប្រាក់យ៉ន់ចិន និងភ្ជាប់ការទូទាត់ជាមួយ Alipay និង WeChat Pay សម្រាប់អតិថិជនធ្វើការទូទាត់ពាណិជ្ជកម្មឆ្លងប្រទេស និងសម្រួលដល់ការទូទាត់របស់ភ្ញៀវទេសចរចិននៅកម្ពុជាផងដែរ។
ក្នុងឱកាសនោះដែរ លោកជំទាវ ទេសាភិបាលរង ក៏ត្រូវបានអញ្ជើញចូលរួមជាវាគ្មិនក្នុងកិច្ចពិភាក្សាក្រោមប្រធានបទ “បច្ចេកវិទ្យាហិរញ្ញវត្ថុនិងការលើកកម្ពស់បរិយាប័ន្នហិរញ្ញវត្ថុ” ផងដែរ។ លោកជំទាវបានចែករំលែកបទពិសោធន៍របស់ធនាគារជាតិនៃកម្ពុជាក្នុងការប្រើប្រាស់បច្ចេកវិទ្យាហិរញ្ញវត្ថុក្នុងវិស័យទូទាត់ដើម្បីជំរុញបរិយាប័ន្នហិរញ្ញវត្ថុ ដោយផ្តោតលើគោលនយោបាយសំខាន់ៗមួយចំនួនរួមមាន៖ ១/-ការផ្តល់នូវក្របខ័ណ្ឌបទប្បញ្ញត្តិអំណោយផលក្នុងការគាំទ្រនិងជំរុញការប្រើប្រាស់បច្ចេកវិទ្យាហិរញ្ញវត្ថុ ដោយគិតគូរអំពីតុល្យភាពរវាងនវានុវត្តន៍និងស្ថិរភាព ២/-ការកសាងហេដ្ឋារចនាសម្ព័ន្ធកណ្តាលដើម្បីលើកកម្ពស់ការធ្វើប្រតិបត្តិការឆ្លងគ្នា (Interoperability) រវាងគ្រឹះស្ថានដែលផ្តល់សេវាទូទាត់ ៣/-ការពង្រឹងកិច្ចសហប្រតិបត្តិការក្នុងតំបន់ដើម្បីជំរុញការភ្ជាប់ប្រព័ន្ធទូទាត់ឆ្លងប្រទេស។ ការអនុវត្តគោលនយោបាយទាំងនេះនឹងរួមចំណែកកាត់បន្ថយកម្រៃសេវាទូទាត់និងផ្ទេរប្រាក់ បង្កើនភាពងាយស្រួលសម្រាប់អ្នកប្រើប្រាស់ ពង្រីកការផ្តល់សេវាដល់ជនបទ ដែលជាកត្តាជំរុញឱ្យប្រជាជនងាកមកប្រើប្រាស់សេវាតាមបណ្តាញផ្លូវការវិញ។ ទន្ទឹមនោះ លោកជំទាវក៏បានលើកឡើងអំពីបញ្ហាប្រឈមមួយចំនួនពាក់ព័ន្ធនឹងការប្រើប្រាស់បច្ចេកវិទ្យាហិរញ្ញវត្ថុ ដែលទាមទារឱ្យមានការយកចិត្តទុកដាក់រួមមាន ភាពគ្រប់គ្រាន់និងភាពបត់បែននៃបទប្បញ្ញត្តិ បម្រែបម្រួលឆាប់រហ័សនៃទីផ្សារ ស្តង់ដារ ការសម្អាតប្រាក់និងហិរញ្ញប្បទានភេរវកម្ម និងជាពិសេស សុវត្ថិភាពបណ្តាញ (Cyber Security) និងតុល្យភាព រវាងនវានុវត្តនិងស្ថិរភាព។
