១២ វិចិ្ឆកា ២០១៩
នៅថ្ងៃអង្គារ ១រោច ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១២ ខែវិច្ឆិកា ឆ្នាំ២០១៩ លោកជំទាវ ជា សិរី ឧបការីទេសាភិបាល និងជាអគ្គនាយកបច្ចេកទេស ធនាគារជាតិនៃកម្ពុជា ត្រូវបានអញ្ជើញចូលរួមជាវាគ្មិនក្នុងកិច្ចពិភាក្សាក្រោមប្រធានបទ “ទស្សនាទាននៃរូបិយវត្ថុឌីជីថល” នៅក្នុងកម្មវិធីពិព័រណ៍បច្ចេកវិទ្យាហិរញ្ញវត្ថុសិង្ហបុរី រួមជាមួយនឹងវាគ្មិនដែលមានកេរ្តិ៍ឈ្មោះល្បីល្បាញ ៣រូបផ្សេងទៀត រួមមាន លោក Christian Catalini ស្ថាបនិកនៃប្រព័ន្ធ Libra របស់ក្រុមហ៊ុនហ្វេសប៊ុក, លោក Mu Changchun អគ្គនាយកនៃវិទ្យាស្ថានរូបិយវត្ថុឌីជីថលនៃធនាគារកណ្តាលចិន, លោក Umar Farooq ប្រធានផ្នែក Blockchain នៃធនាគារ JP Morgan។ ក្នុងកិច្ចពិភាក្សានេះ អ្នកទាំងបួនបានចូលរួមចែករំលែកនូវទស្សន:របស់ខ្លួនពាក់ព័ន្ធនឹងការវិវត្តនៃរូបិយវត្ថុឌីជីថល ទាំងក្នុងវិស័យឯកជននិងសាធារណៈ ព្រមទាំងឈានទៅដល់ការជជែកវែកញែកអំពីគោលដៅ និងបញ្ហាប្រឈមនានានៅក្នុងរបៀបវារៈនេះ។ ឆ្លៀតក្នុងឱកាសនោះ លោកជំទាវក៏បានលើកឡើងថា ធនាគារជាតិនៃកម្ពុជាគឺជាធនាគារកណ្តាលដំបូងដែលបានដាក់ឱ្យដំណើរការប្រព័ន្ធទូទាត់បាគងដែលប្រើប្រាស់បច្ចេកវិទ្យា Blockchain ដើម្បីជំរុញការធ្វើប្រតិបត្តិការឆ្លងគ្នារវាងគ្រឹះស្ថានធនាគារនិងហិរញ្ញវត្ថុ សំដៅផ្តល់ភាពងាយស្រួលសម្រាប់ការទូទាត់ និងលើកកម្ពស់បរិយាប័ន្នហិរញ្ញវត្ថុនៅកម្ពុជា។
