១៦ កញ្ញា ២០១៩
នាព្រឹកថ្ងៃចន្ទ ៣រោច ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៦ ខែកញ្ញា ឆ្នាំ២០១៩ ធនាគារជាតិនៃកម្ពុជាបានរៀបចំកិច្ចប្រជុំទ្វេភាគីប្រចាំឆ្នាំជាមួយធនាគាររដ្ឋវៀតណាម ក្រោមអធិបតីភាពរបស់ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា និង ឯកឧត្តម Le Minh Hung ទេសាភិបាល ធនាគាររដ្ឋវៀតណាម។ កិច្ចប្រជុំទ្វេភាគីត្រូវបានរៀបចំឡើងក្នុងគោលបំណងរឹតចំណងកិច្ចសហប្រតិបត្តិការ និងទំនាក់ទំនងជាមិត្តភាពរវាងធនាគារកណ្តាលទាំងពីរ។ នៅក្នុងកិច្ចប្រជុំទ្វេភាគីនេះ ធនាគារកណ្តាលទាំងពីរបានពិភាក្សាផ្លាស់ប្តូរយោបល់លើ៖ i/- ស្ថានភាពម៉ាក្រូសេដ្ឋកិច្ចនិងវិស័យធនាគារ និង ii/- វឌ្ឍនភាពនៃកិច្ចសហប្រតិបត្តិការទ្វេភាគី។ កិច្ចប្រជុំនេះបានបញ្ចប់ដោយជោគជ័យនិងប្រកបដោយផ្លែផ្កា ហើយភាគីទាំងពីរបានប្តេជ្ញាបន្តពង្រឹងនិងពង្រីកកិច្ចសហប្រតិបត្តិការទេ្វភាគីនេះឱ្យកាន់តែល្អជានិរន្តរ៍។
