២៧ សីហា ២០១៩
នាព្រឹកថ្ងៃអង្គារ ១២រោច ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៧ ខែសីហា ឆ្នាំ២០១៩ ធនាគារជាតិនៃកម្ពុជា បានរៀបចំសិក្ខាសាលាថ្នាក់ខេត្ត ស្តីពី “វិស័យមីក្រូហិរញ្ញវត្ថុនៅកម្ពុជា” នៅស្រុកសង្កែ ខេត្តបាត់ដំបង ក្រោមអធិបតីភាពរបស់ ឯកឧត្តម ស៊ុំ សន្និសិទ្ធ ទេសាភិបាលរងធនាគារជាតិនៃកម្ពុជា។ សិក្ខាសាលានេះមានការចូលរួមពី ឯកឧត្តម ផេង សុទ្ធី អភិបាលនៃគណៈអភិបាលក្រុងបាត់ដំបង ឯកឧត្តម រ័ត្ន សុវណ្ណនរៈ អគ្គនាយកត្រួតពិនិត្យ ធនាគារជាតិនៃកម្ពុជា លោក ហ៊ុយ ណាវី ទីប្រឹក្សាធនាគារជាតិនៃកម្ពុជា លោក សុខ ហឿន អភិបាលស្តីទីនៃគណៈអភិបាលស្រុកសង្កែ លោកឧកញ៉ាបណ្ឌិត ប៊ុន មុនី អនុប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា ព្រមទាំង មន្ត្រីធនាគារជាតិនៃកម្ពុជា មន្ត្រីរាជបណ្ឌិតសភាកម្ពុជា មន្ត្រីគ្រឹះស្ថានធនាគារនិងហិរញ្ញវត្ថុ អាជ្ញាធរមូលដ្ឋានក្រុងប៉ៃលិន និងប្រជាពលរដ្ឋក្នុងស្រុកសង្កែ ចំនួនប្រមាណ ៣៨០នាក់។ សិក្ខាសាលានេះ ត្រូវបានរៀបចំទ្បើងក្នុងគោលបំណង ១/- ផ្សព្វផ្សាយអំពីប្រវត្តិនៃការអភិវឌ្ឍវិស័យមីក្រូហិរញ្ញវត្ថុនៅកម្ពុជា ២/- ច្បាប់និងបទប្បញ្ញត្តិពាក់ព័ន្ធនានា ៣/- សេវាកម្មរបស់គ្រឹះស្ថានធនាគារនិងហិរញ្ញវត្ថុដែលមានអាជ្ញាបណ្ណស្របច្បាប់ ៤/- បញ្ហាប្រឈមនៃវិស័យមីក្រូហិរញ្ញវត្ថុនៅកម្ពុជា និង៥/- ដំណោះស្រាយនិងសំណូមពរចំពោះអាជ្ញាធរមានសមត្ថកិច្ច គ្រឹះស្ថានធនាគារនិងហិរញ្ញវត្ថុ និងអតិថិជនជាដើម។ លើសពីនេះទៀត អង្គសិក្ខាសាលាបានបង្កើនទំនាក់ទំនងកិច្ចសហការល្អ រវាងអាជ្ញាធរមូលដ្ឋាននិងភាគីពាក់ព័ន្ធនានា ជាពិសេស ជាមួយធនាគារជាតិនៃកម្ពុជា ដើម្បីបន្តក្តាប់ឱ្យបាននូវស្ថានភាពជាក់ស្តែងរបស់ប្រជាជនប្រើប្រាស់សេវាមីក្រូហិរញ្ញវត្ថុ និងធ្វើយ៉ាងណាបញ្ចៀសការប្រើប្រាស់សេវាកម្ចីដែលមិនមានអាជ្ញាប័ណ្ណត្រឹមត្រូវ។
