០៨ សីហា ២០១៩
នារសៀលថ្ងៃព្រហស្បតិ៏ ៨កើត ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៨ ខែសីហា ឆ្នាំ២០១៩ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម ទេសាភិបាល ធនាគារជាតិនៃកម្ពុជា លោកជំទាវ នាវ ច័ន្ទថាណា ទេសាភិបាលរង ធនាគារជាតិនៃកម្ពុជា បានទទួលជួបពិភាក្សាការងារជាមួយគណៈប្រតិភូរបស់ក្រុមហ៊ុនប័ណ្ណទូទាត់អន្តរជាតិ VISA (VISA International Card Scheme Company) ដែលដឹកនាំដោយលោក Chris Clark នាយកប្រតិបត្តិប្រចាំតំបន់អាស៊ី- ប៉ាស៊ីហ្វិក របស់ក្រុមហ៊ុន VISA។ ក្នុងឱកាសនោះ លោក Chris Clark បានរាយការណ៍ជូនពីវឌ្ឍនភាពនៃការធ្វើប្រតិបត្តិការ និងកិច្ចសហប្រតិបត្តិការផ្សេងៗទៀតនៅកម្ពុជារួមមាន ការចុះអនុស្សារណៈយោគយល់ជាមួយសមាគមន៍ធនាគារនៅកម្ពុជា ស្ដីពីការគ្រប់គ្រងនិងចែកចាយបន្តលើការប្រើប្រាស់ស្តង់ដារ EMV Chip ដល់សមាជិករបស់សមាគមន៍ធនាគារ ការដាក់ឱ្យប្រើប្រាស់ស្តង់ដារ QR Code សម្រាប់ការទូទាត់ ការលើកកម្ពស់សុវត្ថិភាពសេវាទូទាត់ និងការបន្តចូលរួមគាំទ្រដល់ការផ្សព្វផ្សាយពីចំណះដឹងផ្នែកហិរញ្ញវត្ថុនៅកម្ពុជាជាដើម។
