០៧ សីហា ២០១៩
នាព្រឹកថ្ងៃពុធ ៧កើត ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៧ ខែសីហា ឆ្នាំ២០១៩ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានអញ្ជើញចូលរួមជាអធិបតីភាពក្នុងពិធីបើកសិក្ខាសាលាភាពជាអ្នកដឹកនាំស្តីពី “Becoming a Deliberately Developmental Organization by Utilizing Leadership Intelligence” ដែលរៀបចំឡើងដោយធនាគារជាតិនៃកម្ពុជា និងមាន លោកសាស្ត្រាចារ្យ Jim Bagnola ជាគ្រូឧទ្ទេសនាម ប្រកបដោយបទពិសោធន៍ខ្ពស់លើការបណ្តុះបណ្តាលភាពជាអ្នកដឹកនាំ និងការគ្រប់គ្រងចិត្តគំនិត។ សិក្ខាសាលានេះ មានគោលបំណងបង្ហាញពីការប្រែក្លាយស្ថាប័នមួយប្រកបដោយការអភិវឌ្ឍចេញពីការប្តេជ្ញាចិត្តជាមួយនឹងការប្រើប្រាស់នូវភាពជាអ្នកដឹកនាំដ៏វៃឆ្លាត ដែលក្នុងនោះផ្តោតជាសំខាន់លើការពង្រីកចំណេះដឹងបន្ថែមលើភាពជាអ្នកដឹកនាំ សម្រាប់ការអភិវឌ្ឍស្ថាប័នប្រកបដោយចីរភាព ជាពិសេសតាមរយៈ i/-ការវាយតម្លៃបុគ្គលិកប្រកបដោយសុភវិនិច្ឆ័យ ii/-ការប្រែក្លាយដំណោះស្រាយល្អៗដែលធ្លាប់អនុវត្តពីមុនឱ្យទៅជាគោលការណ៍ iii/-ការប្រើប្រាស់បញ្ញាញាណផ្នែកផ្លូវចិត្ត សង្គម សីលធម៌ វប្បធម៌ យ៉េនឌ័រ និងសហប្រតិបត្តិការល្អ ដើម្បីក្លាយជាអ្នកដឹកនាំល្អ មន្ត្រីល្អ និងស្ថាប័នល្អ។ វិស័យធនាគារបានរីកចម្រើនយ៉ាងឆាប់រហ័សក្នុងរយៈពេលពីរទសវត្សរ៍ចុងក្រោយនេះ ទាំងផ្នែកទំហំ វិសាលភាពប្រតិបត្តិការ និងផលិតផលសេវា។ ការគ្រប់គ្រងវិស័យធនាគារប្រកបដោយការអភិវឌ្ឍនិងស្ថិរភាព ត្រូវការធនធានមនុស្សប្រកបដោយជំនាញ និងភាពជាអ្នកដឹកនាំខ្ពស់ ហើយប្រការនេះ កាន់តែមានភាពចាំបាច់នាពេលបច្ចុប្បន្នស្ថិតក្នុងបរិការណ៍នៃសាកលភាវូបនីយកម្ម និងការរីកចម្រើននៃបច្ចេកវិទ្យា។ គួររំលឹកផងដែរថា ធនាគារជាតិនៃកម្ពុជា ធ្លាប់បានរៀបចំសិក្ខាសាលាស្តីពីភាពជាអ្នកដឹកនាំនេះចំនួន ២ ដងរួចមកហើយ ដោយលើកទី១ ស្តីពីសិល្បៈនៃការដឹកនាំ និងទំនាក់ទំនងផ្ទៃក្នុងនិងខាងក្រៅ និងលើកទី២ ស្តីពីការបង្វឹកនិងវាយតម្លៃសមិទ្ធកម្ម។ សិក្ខាសាលានេះ មានសារៈសំខាន់ណាស់ក្នុងការរួមចំណែកបង្កើនប្រសិទ្ធភាពនៃភាពជាអ្នកដឹកនាំរបស់មន្ត្រីធនាគារជាតិនៃកម្ពុជា ។
