២៧ ឧសភា ២០១៩
នាព្រឹកថ្ងៃចន្ទ ៩រោច ខែពិសាខ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៧ ខែឧសភាឆ្នាំ២០១៩ ដោយបានទទួលការអនុញ្ញាតដ៏ខ្ពង់ខ្ពស់ពីឯកឧត្តមទេសាភិបាល ធនាគារជាតិនៃកម្ពុជា លោក គិត សុវណ្ណារិទ្ធ អគ្គនាយករងត្រួតពិនិត្យនៃធនាគារជាតិនៃកម្ពុជា បានដឹកនាំក្រុមការងារសហការជាមួយសាលាស្រុកបាកាននៃខេត្តពោធិ៍សាត់រៀបចំសិក្ខាសាលាថ្នាក់ស្រុកស្តីពី “វិស័យមីក្រូហិរញ្ញវត្ថុនៅកម្ពុជា”។ សិក្ខាសាលានេះមានការចូលរួមពី លោក ផាយ ឡេង អភិបាលនៃគណៈអភិបាលស្រុកបាកាន និងលោកឧកញ៉ា ហួត អៀងតុង សមាជិកក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា ព្រមទាំងមន្ត្រីរាជបណ្ឌិត្យសភាកម្ពុជា មន្ត្រីគ្រឹះស្ថានមីក្រូហិរញ្ញវត្ថុ មន្ត្រីធនាគារពាណិជ្ជ មន្ត្រីសមាគមមីក្រូហិរញ្ញវត្ថុកម្ពុជា មន្ត្រីសាខាធនាគារជាតិនៃកម្ពុជាខេត្តពោធិ៍សាត់ អាជ្ញាធរមូលដ្ឋានស្រុកបាកាននិងប្រជាពលរដ្ឋក្នុងស្រុកបាកានចំនួនប្រមាណ៥០០នាក់។ សិក្ខាសាលានេះត្រូវបានរៀបចំទ្បើងក្នុងគោលបំណង ១/- ផ្សព្វផ្សាយពីបទប្បញ្ញតិ្តនិងកិច្ចគាំពារអតិថិជនដែលប្រើប្រាស់សេវាមីក្រូហិរញ្ញវត្ថុ ២/- ផ្សព្វផ្សាយបញ្ហាប្រឈមក្នុងវិស័យមីក្រូហិរញ្ញវត្ថុ៣/- ទទួលធាតុចូលអំពីបញ្ហាមីក្រូហិរញ្ញវត្ថុពីប្រជាពលរដ្ឋនិងអាជ្ញាធរដែនដីពាក់ព័ន្ធ ៤/-សេវាកម្មរបស់គ្រឹះស្ថានធនាគារនិងហិរញ្ញវត្ថុដែលមានអាជ្ញាប័ណ្ណស្របច្បាប់ និង៥/- ដោះស្រាយសំណូមពរជាក់ស្តែងដែលបានលើកឡើងក្នុងអង្គសិក្ខាសាលា។ លើសពីនេះទៀតអង្គសិក្ខាសាលាបានបង្កើនទំនាក់ទំនងកិច្ចសហការល្អរវាងអាជ្ញាធរមូលដ្ឋាននិងភាគីពាក់ព័ន្ធនានាដើម្បីបន្តក្តាប់ឱ្យបាននូវស្ថានភាពជាក់ស្តែងរបស់ប្រជាជនប្រើប្រាស់សេវាកម្មមីក្រូហិរញ្ញវត្ថុនិងធ្វើយ៉ាងណាបញ្ចៀសការប្រើប្រាស់សេវាកម្ចីដែលមិនមានអាជ្ញាប័ណ្ណត្រឹមត្រូវ។
