២៣ ឧសភា ២០១៩
កាលពីថ្ងៃព្រហស្បតិ៍ ៥រោច ខែពិសាខ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៣ ខែឧសភា ឆ្នាំ២០១៩ លោកជំទាវ ជា សិរី អគ្គនាយកបច្ចេកទេសនៃធនាគារជាតិនៃកម្ពុជា បានទទួលស្វាគមន៍ទស្សនកិច្ចសិក្សារបស់ធនាគារកណ្ដាលមីយ៉ាន់ម៉ា ដឹកនាំដោយ លោកស្រី Than Than Swe អគ្គនាយកនៃនាយកដ្ឋានត្រួតពិនិត្យគ្រឹះស្ថានហិរញ្ញវត្ថុ និងក្រុមហ៊ុន ក្រេឌីតប្យួរ៉ូមីយ៉ាន់ម៉ា ដឹកនាំដោយលោក Zaw Lin Aung ប្រធានក្រុមប្រឹក្សាភិបាល ក្រុមហ៊ុន ក្រេឌីតប្យួរ៉ូមីយ៉ាន់ម៉ា លីមីធីត នៅធនាគារជាតិនៃកម្ពុជា។ លោកជំទាវ អគ្គនាយកបច្ចេកទេសបានចែករំលែកនូវបទពិសោធន៍ និងគោលជំហររបស់ធនាគារជាតិនៃកម្ពុជា ទាក់ទងនឹង i/-គោលនយោបាយនានា ii/-បទប្បញ្ញត្តិ និង iii/-ឧត្តមានុវត្ត (best practices) ចំពោះការរៀបចំនិងគ្រប់គ្រងការិយាល័យឥណទាននៅកម្ពុជា។ ដំណើរទស្សនកិច្ចសិក្សានេះបានផ្ដល់នូវធាតុចូលបន្ថែមទៀតដល់ធនាគារកណ្ដាលមីយ៉ាន់ម៉ានិងក្រុមហ៊ុនក្រេឌីតប្យួរ៉ូមីយ៉ាន់ម៉ា ក្នុងការអភិវឌ្ឍ រៀបចំនិងគ្រប់គ្រងក្រុមហ៊ុន ក្រេឌីតប្យួរ៉ូមីយ៉ាន់ម៉ា។
