២០ មីនា ២០១៩
កាលពីថ្ងៃពុធ ១៥កើត ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២០ ខែមីនា ឆ្នាំ២០១៩ លោកជំទាវ ជា សិរី អគ្គនាយកបច្ចេកទេស ធនាគាជាតិនៃកម្ពុជា បានចូលរួមសន្និសីទរូបិយវត្ថុ អាស៊ី ២០/២០ នៅប្រទេសសឹង្ហបុរី ។ សន្និសីទប្រចាំឆ្នាំនេះ ជាវេទិកាមួយប្រមូលផ្តុំទៅដោយអ្នកជំនាញឈានមុខនៅលើឆាកអន្តរជាតិ ពាក់ព័ន្ធនឹងការទូទាត់ សេវាហិរញ្ញវត្ថុ និងបច្ចេកវិទ្យាហិរញ្ញវត្ថុ ។ សន្និសីទនេះរៀបចំឡេីងក្នុងគោលបំណង ផ្សាភ្ជាប់ទំនាក់ទំនង ផ្លាស់ប្តូរបទពិសោធន៍ និងពិភាក្សាលើកាវិវឌ្ឍន៍ចម្បងៗនាពេលអនាគត អំពីមុខងាររូបិយវត្ថុនៅក្នុងតំបន់អាស៊ី។ នៅក្នុងសន្និសីទនេះផងដែរ លោកជំទាវ ជា សិរី បានចូលរួមជាវាគ្មិនចែករំលែកទស្សនៈ និងបទពិសោធន៍លើប្រធានបទសំខាន់ៗចំនួន២គឺ៖ " ការរក្សាតុល្យភាពរវាងហានិភ័យ ជាមួយនឹងនវានុវត្តន៍ " និង " ការរក្សាតុល្យភាពរវាងហានិភ័យ ជាមួយនឹងបរិយាប័ន្ន"។ លោកជំទាវបានរំលេចពីសារៈសំខាន់ក្នុងការរៀបចំបទប្បញ្ញត្តិសមស្របក្នុងការជំរុញនវានុវត្តន៍ ក៏ដូចជាគ្រប់គ្រងហានិភ័យ។ បទប្បញ្ញត្តិបេីកទូលាយប្រតិបត្តិការឆ្លងប្រព័ន្ធ អត្តសញ្ញាណឌីជីថល និងការចែករំលែកទិន្នន័យ ជាផ្នែកមួយគាំទ្រដល់នវានុវត្តន៍ និងជាសក្តានុពលសម្រាប់ការបោះជំហ៊ានទៅមុខឆាប់រហ័ស។ លោកជំទាវក៏បានលើកឡើងពីបញ្ហាពាក់ព័ន្ធ ចំណេះដឹងផ្នែកហិរញ្ញវត្ថុ សុច្ចរិតភាពផ្នែកហិរញ្ញវត្ថុ និងសហគ្រិនភាព ដែលជាគន្លឹះក្នុងការលេីកកម្ពស់បរិយាប័ន្ននៅក្នុងយុគសម័យឌីជីថល។
