០៦ មីនា ២០១៩
នាថ្ងៃព្រហស្បតិ៍ ២កើត ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៧ ខែមីនា ឆ្នាំ២០១៩ លោកជំទាវ នាវ ច័ន្ទថាណា ទេសាភិបាលរង តំណាងដ៏ខ្ពង់ខ្ពស់របស់ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានអញ្ជើញជាអធិបតីក្នុងពិធីសម្ពោធបើកដំណើរការជាផ្លូវការ ការិយាល័យតំណាងពាណិជ្ជកម្ម ធនាគារ អិចផត-អ៊ីមផត ប៊ែង អហ្វ ថៃលែន នៅរាជធានីភ្នំពេញ។ ការសម្ពោធបើកការិយាល័យតំណាងពាណិជ្ជកម្ម ធនាគារ អិចផត-អ៊ីមផត ប៊ែង អហ្វ ថៃលែន ដែលជាធនាគារដ៏ធំមួយរបស់ព្រះរាជាណាចក្រ ថៃ នៅក្នុងប្រទេសកម្ពុជា នាពេលនេះ ជាសក្ខីភាពបង្ហាញពី ជំនឿទុកចិត្តរបស់វិនិយោគិនកាន់តែខ្លាំងថែមទៀត មកកាន់ ព្រះរាជាណាចក្រកម្ពុជា នៅពេលដែលប្រទេសនេះកំពុងរក្សាបាននូវ ស្ថេរភាពម៉ាក្រូសេដ្ឋកិច្ចប្រកបដោយភាពរឹងមាំ ស្ថេភាពនយោបាយ និងសុខសន្តិភាពពេញលេញ។ គួរកត់សម្គាល់ផងដែរថា វិស័យធនាគារនិងហិរញ្ញវត្ថុនៅកម្ពុជា បច្ចុប្បន្ន មានការវិវត្ត រីកចម្រើនយ៉ាងឆាប់រហ័សប្រកបដោយភាពរឹងមាំនិងបរិយាបន្ន ព្រមទាំងទទួលបានការចាប់អារម្មណ៍និងជឿកទុកចិត្តខ្ពស់ពីវិនិយោគិនធំៗ មកពីបណ្តាប្រទេសដូចជា បារាំង ជប៉ុន កាណាដា ចិន កូរ៉េ ម៉ាឡេស៊ី ថៃ និងវៀតណាម ជាដើម។
