១១ ធ្នូ ២០១៨
នារសៀលថ្ងៃអង្គារ ៤កើត ខែមិគសិរ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១១ ខែធ្នូ ឆ្នាំ២០១៨ ឯកឧត្តម រ័ត្ន សុវណ្ណនរៈ អគ្គនាយកត្រួតពិនិត្យ និងជាឧបការី ឯកឧត្តម ទេសាភិបាល តំណាងដ៏ខ្ពង់ខ្ពស់របស់ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានអញ្ជើញជាអធិបតីក្នុងពិធីសម្ពោធបើកដំណើរការជាផ្លូវការ នូវការិយាល័យទីស្នាក់ការកណ្តាលថ្មីរបស់ធនាគារ សហពាណិជ្ជ ក.អ ដែលស្ថិតក្នុងតំបន់ពាណិជ្ជកម្ម និងចំកណ្តាលបេះដូងនៃទីក្រុងភ្នំពេញ។ ការណ៍នេះ បានបង្ហាញពីការប្តេជ្ញាចិត្តខ្ពស់របស់ ភាគទុនិកធនាគារ សហពាណិជ្ជ ក.អ ក្នុងការវិនិយោគយូរអង្វែងនៅក្នុងប្រទេសកម្ពុជា។ លើសពីនេះ ការសម្រេចបានជារូបរាងនូវអគារថ្មីដ៏ស្រស់ស្អាតនេះក៏បានឆ្លុះបញ្ចាំង អំពីភាពរឹងមាំនិង រីកចម្រើនថែមទៀតរបស់ធនាគារ ក្នុងការជំរុញដល់ការបង្កើនជំនឿទុកចិត្តរបស់សាធារណជនទូទៅ និងវិនិយោគិនជាតិនិងអន្តរជាតិ មកលើវិស័យធនាគារនិងហិរញ្ញវត្ថុ។
