០៣ តុលា ២០១៨
នៅថ្ងៃពុធ ៩រោច ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣ ខែតុលា ឆ្នាំ២០១៨ លោកជំទាវ ជា សិរី ឧបការីទេសាភិបាល និងជាអគ្គនាយកបច្ចេកទេស ធនាគារជាតិនៃកម្ពុជា បានទទួលជួបក្រុមប្រឹក្សាធុរកិច្ចអាស៊ាន-សហរដ្ឋអាមេរិក ដោយមានវត្តមានរបស់តំណាងក្រុមហ៊ុន Ford, Visa និង Master ជាដើម។ កិច្ចប្រជុំនេះមានគោលបំណងពិភាក្សាអំពីលទ្ធភាពពង្រីកអាជីវកម្មរបស់ក្រុមហ៊ុនអាមេរិកនៅកម្ពុជា។ នៅឆ្នាំនេះ កិច្ចពិភាក្សាបានសង្កត់ធ្ងន់លើ វិស័យកសិកម្ម ទេសចរណ៍ ការទូរទាត់អេឡិចត្រូនិក ការធ្វើទំនើបកម្មទូរគមនាគមន៍ ដែលរួមមាន e-commerce និង e-government។
លោកជំទាវ ជា សិរី បានបង្ហាញពីភាពរឹងមាំនៃស្ថានភាពម៉ាក្រូសេដ្ឋកិច្ចកម្ពុជា និងការបើកចំហរបស់សេដ្ឋកិច្ចកម្ពុជា ដែលអាចផ្តល់កាលានុវត្តភាពដល់ការវិនិយោគ នវានុវត្តន៍ និងការធ្វើឌីជីថលភាវូបនីយកម្ម ជាដើម។ នារយៈពេលប៉ុន្មានឆ្នាំចុងក្រោយនេះ ធនាគារជាតិនៃកម្ពុជាបានបន្តជំរុញដល់ការអភិវឌ្ឍប្រព័ន្ធទូទាត់នៅកម្ពុជា តាមរយៈការធ្វើទំនើបកម្មប្រព័ន្ធទូទាត់ដូចជា ប្រព័ន្ធទូទាត់រហ័ស (FAST) និងប្រព័ន្ធខេមបូឌានស៊ែស្វីច (CSS) រួមជាមួយនឹងការដាក់ចេញនូវបទប្បញ្ញត្តិសមស្របចំពោះក្រុមហ៊ុនផ្តល់សេវាទូទាត់នានា។ បន្ថែមលើនេះ លោកជំទាវ ក៏បានលើកឡើងផងដែរពីសក្តានុពលនៃវិស័យកសិកម្មនៅកម្ពុជា ដែលសម្បូរដោយផ្ទៃដីអាចដាំដុះបាន ជាមួយនឹងការអាចឈានចូលក្នុងទីផ្សារអន្តរជាតិ ជាពិសេសទីផ្សារប្រទេសចិន ខណៈដែលវិស័យនេះមិនទាន់ទទួលបានការវិនិយោគច្រើននៅឡើយ។
