២៦ កញ្ញា ២០១៨
នៅព្រឹកថ្ងៃពុធ ២រោច ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៦ ខែ កញ្ញា ឆ្នាំ២០១៨ អង្គភាពស៊ើបការណ៍ហិរញ្ញវត្ថុកម្ពុជា និងអង្គភាពស៊ើប ការណ៍ហិរញ្ញវត្ថុហ្វីលីពីន បានចុះហត្ថលេខាលើអនុស្សរណៈយោគយល់ស្តីពីការផ្លាស់ប្តូរព័ត៌មានហិរញ្ញវត្ថុពាក់ព័ន្ធនឹងការសម្អាតប្រាក់និងហិរញ្ញប្បទានភេរវកម្ម ក្នុងអំឡុងពេលមហាសន្និបាតប្រចាំឆ្នាំ លើកទី២៥ របស់ក្រុម Egmont នៅទីក្រុងស៊ីដនី ប្រទេសអូស្ត្រាលី រវាងលោកជំទាវ សាយ សំអាត ឧបការី ឯកឧត្តមទេសាភិបាល និងជាអគ្គលេខាធិការ អង្គភាពស៊ើបការណ៍ហិរញ្ញវត្ថុកម្ពុជា និងលោក Mel Georgie B. Racela ប្រធានអង្គភាពស៊ើបការណ៍ហិរញ្ញវត្ថុហ្វីលីពីន។ អនុស្សរណៈនេះសំដៅចូលរួមជាមួយសហគមន៍អន្តរជាតិក្នុងការប្រយុទ្ធប្រឆាំងការសម្អាតប្រាក់និងហិរញ្ញប្បទានភេរវកម្ម និងអាចឱ្យអាជ្ញាធរទាំងពីរមានយន្តការផ្លាស់ប្តូរព័ត៌មានច្បាស់លាស់មួយ ដើម្បីតាមដាន ទប់ស្កាត់ និងលុបបំបាត់ឧក្រិដ្ឋកម្មសម្អាតប្រាក់និងហិរញ្ញប្បទានភេរវកម្ម។
