២៥ សីហា ២០១៨
កាលពីថ្ងៃសៅរ៍ ១៤កើត ខែស្រាពណ៍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២៥ ខែសីហា ឆ្នាំ២០១៨ លោកជំទាវ ជា សិរី អគ្គនាយកបច្ចេកទេសនៃធនាគារជាតិនៃកម្ពុជា បានអញ្ជើញចូលរួមក្នុងពិធីបញ្ចុះបឋមសិលាសាងសង់អាគារបន្ថែមនៃមជ្ឈមណ្ឌលបណ្ដុះបណ្ដាលវិជ្ជាជីវៈតម្បាញសូត្ររបស់ធនាគារ មេយប៊ែង (ខេមបូឌា) ភីអិលស៊ី ដែលប្រារព្ធឡើងនៅខេត្តតាកែវ។ ការសាងសង់ពង្រីកអាគារបន្ថែមនៃមជ្ឈមណ្ឌលបណ្ដុះបណ្ដាលវិជ្ជាជីវៈតម្បាញសូត្ររបស់ធនាគារ មេយប៊ែង (ខេមបូឌា) ភីអិលស៊ី នឹងបន្តចូលរួមចំណែកយ៉ាងសកម្មក្នុងការផ្ដល់ឱកាសដល់បងប្អូនស្ត្រីនៅក្នុងសហគមន៍ដើម្បីទទួលបាននូវចំណេះដឹងនិងជំនាញពិតប្រាកដនិងបង្កើតឱកាសការងារដើម្បីឱ្យពួកគាត់មានលទ្ធភាពស្វែងរកប្រាក់ចំណូលឱ្យក្លាយជាស្ត្រីដែលអាចរកប្រាក់ចំណូលបានដោយឯករាជ្យ។ ការទទួលបាននូវប្រាក់ចំណូលនេះនឹងអនុញ្ញាតឱ្យស្ត្រីយកទៅផ្គត់ផ្គង់ជីវភាពក្នុងគ្រួសារ ដូចជាលទ្ធភាពបញ្ជូនកូនឱ្យទៅរៀនសូត្របានចប់ចុងចប់ដើម ជាពិសេសការសន្សំនិងការវិនិយោគ។ ទន្ទឹមនេះ លោកជំទាវ ជា សិរី សូមលើកទឹកចិត្តចំពោះស្ត្រីតម្បាញទាំងអស់ឱ្យខិតខំត្រងត្រាប់រៀនសូត្រ ដើម្បីអភិវឌ្ឍសេដ្ឋកិច្ចគ្រួសារ សហគមន៍ និងសង្គមជាតិផងដែរ។ លោកជំទាវសង្ឃឹមយ៉ាងមុតមាំថា ស្ថាប័នទាំងអស់នឹងបន្តចូលរួមចំណែកយ៉ាងសកម្មក្នុងការវិនិយោគលើការផ្ដល់ចំណេះដឹង និងជំនាញដល់ស្ត្រី មិនថានៅតាមទីក្រុង និងតាមទីជនបទ។
