២៣ សីហា ២០១៨
កាលពីថ្ងៃព្រហស្បតិ៍ ១២កើត ខែស្រាពណ៍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២៣ ខែសីហា ឆ្នាំ២០១៨ គណៈប្រតិភូធនាគារជាតិនៃកម្ពុជា ដែលដឹកនាំដោយឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា និងគណៈប្រតិភូធនាគាររដ្ឋវៀតណាម ដឹកនាំដោយឯកឧត្តម Le Minh Hung ទេសាភិបាល ធនាគាររដ្ឋវៀតណាម បានជួបប្រជុំទ្វេភាគី នៅប្រទេសវៀតណាម។ ជំនួបទ្វេភាគីនេះ ត្រូវបានរៀបចំឡើងប្រចាំឆ្នាំ ក្នុងគោលបំណងពង្រឹងកិច្ចសហប្រតិបត្តិការ និងទំនាក់ទំនងមិត្តភាពរវាងធនាគារកណ្តាលទាំងពីរ សំដៅរួមចំណែកដល់ការអភិវឌ្ឍវិស័យធនាគារ ក៏ដូចជាសេដ្ឋកិច្ចក្នុងប្រទេសទាំងពីរ កម្ពុជា-វៀតណាម។
កិច្ចប្រជុំបានប្រព្រឹត្តទៅប្រកបដោយជោគជ័យនិងផ្លែផ្កា ដោយថ្នាក់ដឹកនាំធនាគារកណ្តាលទាំងពីរបានពិភាក្សាផ្លាស់ប្តូរយោបល់លើស្ថានភាពសេដ្ឋកិច្ចនិងធនាគារនៃប្រទេសទាំងពីរ និងបានវាយតម្លៃខ្ពស់ចំពោះវឌ្ឍនភាពនៃកិច្ចសហប្រតិបត្តិការនារយៈពេលមួយឆ្នាំកន្លងទៅ។ ក្រោមអនុស្សរណយោគយល់ដែលបានធ្វើបច្ចុប្បន្នកម្មកាលពីខែកុម្ភៈ ឆ្នាំ២០១៧ កិច្ចសហប្រតិបត្តិការនៃធនាគារកណ្តាលទាំងពីរបានពង្រីកវិសាលភាព ដើម្បីបង្កើនការផ្លាស់ប្តូរបទពិសោធន៍ និងព័ត៌មានទៅវិញទៅមក ពង្រឹងកិច្ចសហការលើការងាររួមគ្នា ដូចជាទៅលើការត្រួតពិនិត្យលើធនាគារដែលមានប្រតិបត្តិការឆ្លងដែននៅក្នុងប្រទេសទាំងពីរ និងការអភិវឌ្ឍការតភ្ជាប់ប្រព័ន្ធទូរទាត់ ព្រមទាំងការអភិវឌ្ឍធនធានមនុស្ស។ បច្ចុប្បន្ន ប្រព័ន្ធធនាគារកម្ពុជា មានសាខាធនាគារវៀតណាមចំនួនប្រាំ ដែលកំពុងធ្វើប្រតិបត្តិការ ហើយបានរួមចំណែកផ្តល់ប្រភពទុនដល់ការវិនិយោគដល់សេដ្ឋកិច្ចកម្ពុជា។ លើសពីនេះ អង្គប្រជុំក៏បានកំណត់ទិសដៅអាទិភាពនៃការពង្រឹងនិងពង្រីកកិច្ចសហប្រតិបត្តិការជាប្រពៃណីលើផ្នែកមួយចំនួន ជាពិសេសទាក់ទងទៅនឹងការបន្តផ្លាស់ប្តូរបទពិសោធន៍អំពីការងារស្នូល ក្នុងនោះរួមមាន ៖ i/- ការគ្រប់គ្រងគោលនយោបាយរូបិយវត្ថុ និងការលើកកម្ពស់ការប្រើប្រាស់រូបិយវត្ថុជាតិ ii/-ការរីកចម្រើននិងការគ្រប់គ្រងបច្ចេកវិទ្យាហិរញ្ញវត្ថុ iii/-ការលើកកម្ពស់បរិយាប័ន្នហិរញ្ញវត្ថុនិងការរួមចំណែកកាត់បន្ថយភាពក្រីក្រ និង iv/- ការពង្រឹងការត្រួតពិនិត្យធនាគារ។ ម្យ៉ាងទៀត ធនាគាររដ្ឋវៀតណាម ក៏បន្តបង្កើនការផ្តល់អាហារូបករណ៍ដល់មន្ត្រីធនាគារជាតិនៃកម្ពុជាសម្រាប់ការសិក្សាថ្នាក់អនុបណ្ឌិតនិងបណ្ឌិតនៅប្រទេសវៀតណាមថែមទៀតផងដែរ។
