២២ ឧសភា ២០១៨
នៅព្រឹកថ្ងៃអង្គារ ៨កើត ខែជេស្ឋ ឆ្នាំច សំរិទ្ធិស័ក ព.ស. ២៥៦២ ត្រូវនឹងថ្ងៃទី២២ ខែឧសភា ឆ្នាំ២០១៨ ធនាគារជាតិនៃកម្ពុជាសហការជាមួយមូលនិធិរូបិវត្ថុអន្តរជាតិ បានរៀបចំសិក្ខាសាលាស្តីពី “ទស្សនវិស័យសេដ្ឋកិច្ចតំបន់អាស៊ីប៉ាស៊ីហ្វិក - វេលាល្អ, វេលាមិនច្បាស់លាស់៖ ពេលដែលត្រូវត្រៀមលក្ខណៈ” នៅធនាគារជាតិនៃកម្ពុជា ក្រោមអធិបតីភាពលោកជំទាវ នាវ ច័ន្ទថាណា ទេសាភិបាលរង និងវត្តមានរបស់លោកស្រី Yong Sarah Zhou តំណាងមូលនិធិរូបិយវត្ថុអន្តរជាតិប្រចាំនៅកម្ពុជា និងថ្នាក់ដឹកនាំនិងមន្ត្រីជំនាញមកពីក្រសួង-ស្ថាប័នរាជរដ្ឋាភិបាល គ្រឹះស្ថានធនាគារនិងហិរញ្ញវត្ថុ និងដៃគូអភិវឌ្ឍន៍នានា សរុបប្រមាណ ១០០នាក់។ ខ្លឹមសារនៃសិក្ខាសាលានេះបានបង្ហាញថា តំបន់អាស៊ីប៉ាស៊ីហ្វិករក្សាបានកំណើនសេដ្ឋកិច្ច ៥,៦% នៅឆ្នាំ២០១៨-២០១៩ ដែលជាកម្រិតខ្ពស់ធៀបនឹងតំបន់ដទៃ និងបានរួមចំណែកប្រមាណពីរភាគបីនៃកំណើនសេដ្ឋកិច្ចពិភពលោក ស្របពេលដែលអតិផរណាបន្តមានកម្រិតទាប។ ទោះយ៉ាងណា តំបន់នេះក៏កំពុងប្រឈមនឹងភាពមិនប្រាកដប្រជាមួយចំនួន រួមមាន៖ i/- ប្រក្រតីកម្មគោលនយោបាយរូបិយវត្ថុ ii/- ទស្សនវិស័យនៃពាណិជ្ជកម្មអន្តរជាតិ iii/- ឥទ្ធិពលនៃកំណែទម្រង់សារពើពន្ធរបស់សហរដ្ឋអាមេរិក និង iv/- ហានិភ័យផ្សេងៗទៀតដូចជា បញ្ហាភូមិសាស្ត្រនយោបាយ និងគ្រោះធម្មជាតិជាដើម។
ដើម្បីអភិវឌ្ឍសេដ្ឋកិច្ចឱ្យមានភាពធន់ និងកំណើនរឹងមាំ អ្នករៀបចំគោលនយោបាយត្រូវយកចិត្តទុកដាក់លើ៖ i/- គោលនយោបាយសារពើពន្ធគួរផ្តោតលើការកសាងលំហសារពើពន្ធ ii/- គោលនយោបាយរូបិយវត្ថុគួរមានភាពម៉ឺងម៉ាត់ iii/- គោលនយោបាយម៉ាក្រូប្រុងប្រយ័ត្នកាន់តែមានសារៈសំខាន់នៅក្នុងសេដ្ឋកិច្ច និង iv/- គោលនយោបាយរចនាសម្ព័ន្ធគួរត្រូវបានអនុវត្តដើម្បីដោះស្រាយបញ្ហាអសកម្មនានា។ ជារួម សិក្ខាសាលានេះបានផ្តល់ជាវេទិកាពិភាក្សាពីទស្សនវិស័យសេដ្ឋកិច្ចក្នុងតំបន់ និងឥទ្ធិពលមកលើកម្ពុជា រវាងភាគីពាក់ព័ន្ធទាំងក្នុងវិស័យឯកជននិងវិស័យសារធារណៈ ដើម្បីបង្កើនការយល់ដឹងឱ្យកាន់តែទូលំទូលាយពីស្ថានភាពសេដ្ឋកិច្ចក្នុងតំបន់ និងផ្តល់ជាធាតុចូលទៅក្នុងការរៀបចំគោលនយោបាយនានា សម្រាប់ការអភិវឌ្ឍវិស័យសេដ្ឋកិច្ចនិងហិរញ្ញវត្ថុនៅកម្ពុជាប្រកបដោយចីរភាព។
