១០ ឧសភា ២០១៨
កាលពីថ្ងៃពុធ ១០រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៩ ខែឧសភា ឆ្នាំ២០១៨ លោកជំទាវ ជា សិរី ឧបការីទេសាភិបាល និងជាអគ្គនាយកបច្ចេកទេស ធនាគារជាតិនៃកម្ពុជា បាន អញ្ជើញចូលរួមវេទិកាស្តីពី ស្ថិរភាពហិរញ្ញវត្ថុ និងបច្ចេកវិទ្យាហិរញ្ញវត្ថុ (FinTech) ដែលរៀបចំឡើង ដោយសម្ព័ន្ធសម្រាប់ស្ថិរភាពហិរញ្ញវត្ថុនិងព័ត៌មានវិទ្យា នៅទីក្រុងហុងកុង ប្រទេសចិន។ វេទិកានេះមានអ្នកចូលរួមប្រមាណ ១០០នាក់ ដែលមកពីស្ថាប័នផ្សេងៗ រួមមាន អ្នកជំនាញ FinTech អ្នករៀបចំគោលនយោបាយ និយ័តករ គ្រឹះស្ថានហិរញ្ញវត្ថុ ក្រុមហ៊ុនបច្ចេកវិទ្យាហិរញ្ញវត្ថុ ព្រមទាំងអ្នកសារព័ត៌មានពីតំបន់អាស៊ីនិងជុំវិញពិភពលោក។ ក្នុងឱកាសនោះ លោកជំទាវ ជា សិរី ត្រូវបានអញ្ជើញជាវាគ្មិនកិត្តិយស ដើម្បីធ្វើបទបង្ហាញស្តីពី “កាច្នៃប្រឌិត និងស្ថិរភាពក្នុងតំបន់អាស៊ី ៖ ការដោះស្រាយបញ្ហាប្រឈមហិរញ្ញវត្ថុ”។ គោលបំណងនៃវេទិកានេះ គឺផ្តល់ឱកាសដល់់អ្នកចូលរួមបានពិភាក្សា កំណត់និងវាយតម្លៃពីបញ្ហាប្រឈមស្ថិរភាពប្រព័ន្ធហិរញ្ញវត្ថុនិងដំណោះស្រាយ ដើម្បីលើកកម្ពស់និងពង្រឹងបទដ្ឋាន ដំណើរការ និងការរៀបចំការប្រឆាំងការសម្អាតប្រាក់ ការផ្ទេរប្រាក់ខុសច្បាប់ មូលនិធិឧក្រិដ្ឋកម្ម និងពង្រឹងការការពារឧក្រិដ្ឋកម្មបច្ចេកវិទ្យាហិរញ្ញវត្ថុ សំដៅធានាស្ថិរភាពហិរញ្ញវត្ថុនិងប្រសិទ្ធភាពប្រតិបត្តិការហិរញ្ញវត្ថុតាមរយៈទូរស័ព្ទចល័ត ព្រមទាំងបង្កើនភាពងាយស្រួលដល់អតិថិជននិងអន្តរការីហិរញ្ញវត្ថុ។
