២៥ មេសា ២០១៨
ធនាគារជាតិនៃកម្ពុជា សហការជាមួយសហព័ន្ធបរិយាប័ន្នហិរញ្ញវត្ថុ (Alliance for Financial Inclusion) ហៅកាត់ថា AFI ក្នុងការរៀបចំកិច្ចប្រជុំក្រុមការងាររបស់សហព័ន្ធបរិយាប័ន្នហិរញ្ញវត្ថុ (AFI) ចំនួន ២ គឺក្រុមការងាររៀបចំយុទ្ធសាស្រ្តបរិយាប័ន្នហិរញ្ញវត្ថុ (FISPLG) និង ក្រុមការងាររៀបចំបទដ្ឋានរួមសម្រាប់បរិយាប័ន្នហិរញ្ញវត្ថុ (GSP)។ កិច្ចប្រជុំនេះមានគោលបំណងបន្តកិច្ចពិភាក្សានិងការរៀបចំគោលនយោបាយនានាពាក់ព័ន្ធនឹងការលើកកម្ពស់បរិយាប័ន្នហិរញ្ញវត្ថុ និងជាពិសេសចំពោះការលើកកម្ពស់ប្រជាពលរដ្ឋនៅជនបទឲ្យមានលទ្ធភាព ទទួលបាននិងប្រើប្រាស់សេវាហិរញ្ញវត្ថុផ្លូវការ។
នៅថ្ងៃពុធ ១១កើត ខែពិសាខ ឆ្នាំច សំរឹទ្ធិស័ក ព.ស ២៥៦១ ត្រូវនឹងថ្ងៃទី២៥ ខែមេសា ឆ្នាំ២០១៨ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានអញ្ជើញជាអធិបតីបើកកិច្ចប្រជុំក្រុមការងារខាងលើ។ សហព័ន្ធបរិយាប័ន្នហិរញ្ញវត្ថុ ឬ AFI គឺជាស្ថាប័នអន្តរជាតិមិនស្វែងរកបា្រក់ចំណេញ និងមានបេសកកម្មផ្តោតសំខាន់លើការរៀបចំគោលនយោបាយនិងក្របខណ្ឌបទប្បញ្ញត្តិពាក់ព័ន្ធនឹងបរិយាប័ន្នហិរញ្ញវត្ថុ។
នៅក្នុងពិធីបើកកិច្ចប្រជុំខាងលើ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានមានប្រសាសន៍ថា នេះគឺជាលើកទីមួយហើយដែលសហព័ន្ធបរិយាប័ន្នហិរញ្ញវត្ថុ ហៅកាត់ថា AFI បានសម្រេចជ្រើសរើសយកប្រទេសកម្ពុជា ជាពិសេសខេត្តសៀមរាបតែម្តង ជាទីកន្លែងរៀបចំកិច្ចប្រជុំខាងលើនេះ និងការចូលរួមពីអ្នករៀបចំគោលនយោបាយ បញ្ញត្តិករ មន្ត្រីត្រួតពិនិត្យ មន្រ្តីធនាគារកណ្តាល និងភាគីពាក់ព័ន្ធផ្សេងទៀតដូចជា ស្ថាប័ននានារបស់អង្គការសហប្រជាជាតិ និងស្ថាប័នស្រាវជ្រាវអន្តរជាតិជាដើម សរុបប្រមាណ ៩០ រូប មកពីប្រទេសចំនួន ៤៣ នៃគ្រប់ទ្វីបទាំងអស់ដែលជាសមាជិករបស់សហព័ន្ធ AFI។
ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា ក៏បានមានប្រសាសន៍ដែរថា ការលើកកម្ពស់បរិយាប័ន្នហិរញ្ញវត្ថុ និងជាពិសេសការជំរុញឲ្យប្រជាពលរដ្ឋជនបទអាចទទួលបាននិងប្រើប្រាស់សេវាហិរញ្ញវត្ថុផ្លូវការ បានរួមចំណែកយ៉ាងច្រើនដល់ការជំរុញកំណើនសេដ្ឋកិច្ច និងពង្រឹងស្ថិរភាពហិរញ្ញវត្ថុ។ តាមរយៈលទ្ធផលនៃការអង្កេតស្រាវជ្រាវរបស់ FinScope កាលពីឆ្នាំ២០១៥ បានបង្ហាញថា ៥៩% នៃចំនួនប្រជាពលរដ្ឋពេញវ័យសរុបមានលទ្ធភាពទទួលបាននិងប្រើប្រាស់សេវាហិរញ្ញវត្ថុផ្លូវការ ១២% ទៀតបានប្រើប្រាស់សេវាហិរញ្ញវត្ថុមិនផ្លូវការ និង ២៩% ទៀតពុំទាន់បានប្រើប្រាស់សេវាហិរញ្ញវត្ថុនៅឡើយ។
ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា ក៏បានបញ្ជាក់ផងដែរថា បច្ចុប្បន្ន បច្ចេកវិទ្យាហិរញ្ញវត្ថុមានការរីកចម្រើនយ៉ាងខ្លាំង និងមានតួនាទីសំខាន់ក្នុងការលើកកម្ពស់ការទទួលបាននិងការប្រើបា្រស់សេវាហិរញ្ញវត្ថុឲ្យប្រកបដោយគុណភាពនិងតម្លៃសមស្រប ហើយ ប្រជាពលរដ្ឋដែលប្រើប្រាស់សេវាហិរញ្ញវត្ថុផ្លូវការក៏ទទួលបានការគាំទ្រត្រឹមត្រូវតាមច្បាប់។
ជាបញ្ចប់ ឯកឧត្តម ទេសាភិបាល ក៏បានជម្រាបជូនអង្គពិធីថា បច្ចុប្បន្ន ធនាគារជាតិនៃកម្ពុជា សហការជាមួយក្រសួង-ស្ថាប័ននានា កំពុងរៀបចំសេចក្តីព្រាងស្តីពីយុទ្ធសាស្រ្តជាតិសម្រាប់ បរិយាប័ន្នហិរញ្ញវត្ថុ ហើយគ្រោងនឹងបញ្ចប់រួចរាល់ក្នុងឆ្នាំ២០១៨នេះ។
