០៥ ធ្នូ ២០១៧
ធនាគារជាតិនៃកម្ពុជាបានរៀបចំសន្និសីទម៉ាក្រូសេដ្ឋកិច្ចប្រចាំឆ្នាំលើកទី៤ នៅថ្ងៃអង្គារ ២រោច ខែមិគសិរ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៥ ខែធ្នូ គ.ស. ២០១៧ ស្ដីពី “តួនាទីរបស់បច្ចេកវិទ្យាក្នុងការលើកកម្ពស់បរិយាប័ន្នហិរញ្ញវត្ថុនៅកម្ពុជា” ក្រោមអធិបតីភាពរបស់លោកជំទាវ នាវ ច័ន្ទថាណា ទេសាភិបាលរង ធនាគារជាតិនៃកម្ពុជា។ សន្និសីទនេះមានការអញ្ជើញចូលរួមពីតំណាងមកពីក្រសួងពាក់ព័ន្ធ គ្រឹះស្ថានធនាគារនិងហិរញ្ញវត្ថុសាកលវិទ្យាល័យ វិទ្យាស្ថានស្រាវជ្រាវ សេដ្ឋវិទូ និស្សិត និងសាធារណជន ប្រមាណជាង២៥០ នាក់។
គោលបំណងនៃសន្និសីទនេះ គឺដើម្បីរួមចំណែកអភិវឌ្ឍសមត្ថភាពស្រាវជ្រាវនៅកម្ពុជា លើប្រធានបទសំខាន់ៗពាក់ព័ន្ធនឹងម៉ាក្រូសេដ្ឋកិច្ចនិងវិស័យហិរញ្ញវត្ថុ និងលើកកម្ពស់ការពិភាក្សារវាងភាគីពាក់ព័ន្ធក្នុងចំណោមអ្នកស្រាវជ្រាវ អ្នកជំនាញ និងអ្នករៀបចំគោលនយោបាយ ជាពិសេស ដើម្បីពិភាក្សានិងចែករំលែកចំណេះដឹង អំពីសារៈសំខាន់និងការរីកចម្រើនយ៉ាងឆាប់រហ័សនៃការប្រើប្រាស់បច្ចេកវិទ្យានៅក្នុងវិស័យហិរញ្ញវត្ថុ (Fintech)និង ដើម្បីរួមចំណែកក្នុងគោលនយោបាយលើកកម្ពស់បរិយាប័ន្នហិរញ្ញវត្ថុនៅកម្ពុជា។ប្រធានបទចំនួន៣ ដែលត្រូវបានលើកយកមកពិភាក្សាក្នុងអង្គសន្និសីទ គឺ ៖ i/- ការប្រើប្រាស់ទូរស័ព្ទចល័ត និងបរិយាប័ន្នហិរញ្ញវត្ថុ ii/- វឌ្ឍនភាពនិងឥទ្ធិពលនៃបច្ចេកវិទ្យាលើការទទួលបានសេវាហិរញ្ញវត្ថុ និងiii/- តួនាទីរបស់បច្ចេកវិទ្យាក្នុងការលើកកម្ពស់បរិយាប័ន្នហិរញ្ញវត្ថុ ៖ “បទពិសោធន៍ពីប្រទេសឥណ្ឌា”។
