២០ វិចិ្ឆកា ២០១៧
កាលពីថ្ងៃទី២០ ខែវិច្ឆិកា ឆ្នាំ២០១៧ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានអនុញ្ញាតឱ្យលោកជំទាវ អេវ៉ា ង្វៀន ប៊ិញ ឯកអគ្គរដ្ឋទូតថ្មីនៃប្រទេសបារាំង ចូលជួបសម្តែងការគួរសម ។ ក្នុងឱកាសនេះ ឯកឧត្តម បានជម្រាបជូនលោកជំទាវ ពីវឌ្ឍនភាពសេដ្ឋកិច្ចនៅកម្ពុជា ដោយបានបញ្ជាក់ថា ប្រទេសកម្ពុជាសម្រេចបានកំណើនខ្ពស់ក្នុងរយៈពេលជាងពីរទសវត្សរ៍ចុងក្រោយនេះ ដោយសារមានស្ថិរភាពនយោបាយនិងសុខសន្តិភាពពេញលេញ។ ទន្ទឹមនេះឯកឧត្តម ក៏បានជម្រាបជូនពី ស្ថានភាពប្រព័ន្ធធនាគារនិងការកកើតរូបិយវត្ថុ រហូតដល់ពេលបច្ចុប្បន្ន។ ឯកឧត្តមបានបន្ថែមទៀតថា វឌ្ឍនភាពនៃប្រព័ន្ធធនាគារនៅកម្ពុជាបានរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចនិងកាត់បន្ថយភាពក្រីក្រ។ ជាមួយគ្នានេះដែរ លោកជំទាវក៏បានកោតសរសើរចំពោះការដឹកនាំរបស់រាជរដ្ឋាភិបាលដែលបានរក្សាស្ថិរភាពម៉ាក្រូសេដ្ឋកិច្ច និងនយោបាយ។ លោកជំទាវ ក៏បានកោតសរសើរពីសមិទ្ធផលនានាដែលធនាគារជាតិនៃកម្ពុជាសម្រេចបាន និងបានថ្លែងអំណរអគុណចំពោះឯកឧត្តម ដែលបានអនុញ្ញាតឱ្យលោកជំទាវចូលជួបសម្តែងការគួរសម។
