២៧ តុលា ២០១៧
នៅថ្ងៃទី២៧ ខែតុលា ឆ្នាំ២០១៧ ធនាគារជាតិនៃកម្ពុជាសហការជាមួយមូលនិធិរូបិយវត្ថុអន្តរជាតិបានរៀបចំសិក្ខាសាលាស្តីពីការផ្សព្វផ្សាយទស្សនវិស័យសេដ្ឋកិច្ចពិភពលោករបស់មូលនិធិរូបិយវត្ថុអន្តរជាតិ និងឥទ្ធិពលមកលើកម្ពុជា ក្រោមអធិបតីភាពដ៏ខ្ពង់ខ្ពស់របស់លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា និងលោកស្រី Yong Sarah Zhou តំណាងមូលនិធិរូបិយវត្ថុអន្តរជាតិប្រចាំកម្ពុជាព្រមទាំងថ្នាក់ដឹកនាំ មន្ត្រីជំនាញមកពីក្រសួងពាក់ព័ន្ធ តំណាងដៃគូអភិវឌ្ឍន៍ ស្ថានទូត និងគ្រឹះស្ថានធនាគារនិងហិរញ្ញវត្ថុសរុបប្រមាណ១០០នាក់។
សេដ្ឋកិច្ចពិភពលោកនឹងបង្កើនល្បឿនកំណើនបន្ដិចថែមទៀតនៅឆ្នាំ២០១៧ និង២០១៨ ដល់ ៣,៦% និង ៣,៧% រៀងគ្នា ដែលរួមចំណែកចម្បងដោយកំណើនសេដ្ឋកិច្ចនៅតំបន់អាស៊ី ជាពិសេសចិននិងឥណ្ឌា និងការប្រសើរឡើងវិញនៃសេដ្ឋកិច្ចប្រទេសអភិវឌ្ឍន៍។ នៅតំបន់អាស៊ី សេដ្ឋកិច្ចមានកំណើនល្អប្រសើរក្នុងអត្រា ៥,៦% ក្នុងឆ្នាំ២០១៧ ដោយសារការនាំចេញនិងការនាំចូលមានកម្រិតខ្ពស់ លំហូរចូលនៃមូលធនមានទំហំធំ និងអត្រាអតិផរណាមានកម្រិតទាប។ ចំពោះអាស៊ាន ប្រទេសភាគច្រើនមានកំណើនសេដ្ឋកិច្ចរឹងមាំ ហើយកំណើនសេដ្ឋកិច្ចតំបន់ត្រូវបានរំពឹងថានឹងកើនឡើងក្នុងអត្រា ៥,១% ក្នុងឆ្នាំ២០១៧។ បរិដ្ឋានសេដ្ឋកិច្ចពិភពលោកនិងតំបន់មានភាពអំណោយផលដល់សេដ្ឋកិច្ចកម្ពុជា ជាពិសេសគាំទ្រដល់កំណើនការនាំចេញ វិស័យទេសចរណ៍ និងលំហូរមូលធន។ IMF បានរំពឹងថាសេដ្ឋកិច្ចកម្ពុជានឹងកើនឡើងក្នុងអត្រាប្រមាណ ៧% ក្នុងឆ្នាំ២០១៧និង២០១៨ ជាមួយនឹងអតិផរណាស្ថិតនៅក្នុងកម្រិតទាបអាចគ្រប់គ្រងបានប្រមាណ ៣% ។
