១៤ កញ្ញា ២០១៧
កាលពីថ្ងៃទី ១៤ ខែកញ្ញា ឆ្នាំ២០១៧ លោកជំទាវ នាវ ច័ន្ទថាណា ទេសាភិបាលរង ធនាគារជាតិនៃ កម្ពុជា បានអនុញ្ញាតឱ្យក្រុមបេសកកម្មមកពីការិយាល័យជំនួយបច្ចេកទេសសម្រាប់ឡាវនិងមីយ៉ាន់ម៉ា (TAOLAM) របស់មូលនិធិរូបិយវត្ថុអន្តរជាតិចូលជួបសម្តែងការគួរសម។ ក្រុមបេសកកម្មនេះ ដឹកនាំដោយលោក David Cowen នាយកការិយាល័យ TAOLAM អមដោយលោក Javier Arze del Granado ទីប្រឹក្សាម៉ាក្រូសេដ្ឋកិច្ចនៃការិយាល័យ TAOLAM ដែលនឹងបញ្ចប់អាណត្តិនៅចុងខែកញ្ញានេះ និងVladimir Klyuev ដែលជាអ្នកបន្តតំណែង។ ក្នុងជំនួបនោះ លោក David Cowen បានជម្រាបជូនថា កម្ពុជាទទួលបានឱកាសកាន់តែច្រើនជាងមុនក្នុងការទទួលបានការបណ្តុះបណ្តាលនិងអត្ថប្រយោជន៍ផ្សេងទៀត តាមរយៈការស្នើសុំដល់ការិយាល័យ TAOLAM។ ជាកិច្ចឆ្លើយតប លោកជំទាវ ទេសាភិបាលរង បានថ្លែងអំណរគុណដល់មូលនិធិរូបិយវត្ថុ ជាពិសេសការិយាល័យTAOLAM ដែលតែងតែផ្តល់ការបណ្តុះបណ្តាលដល់មន្ត្រីធនាគារជាតិនៃកម្ពុជា លើផែ្នកសេដ្ឋកិច្ចនិងហិរញ្ញវត្ថុ ដែលទាំងនេះមានសារៈសំខាន់ក្នុងការរួមចំណែកអភិវឌ្ឍសេដ្ឋកិច្ចជាតិប្រកបដោយចីរភាព។
ឆ្លៀតក្នុងឱកាសនៃបេសកកម្មនោះដែរ លោក Javier Arze del Granado និងលោក Vladimir Klyuev បានចូលរួមកិច្ចប្រជុំស្តីពី ក្របខ័ណ្ឌម៉ាក្រូសេដ្ឋកិច្ចសម្រាប់កម្ពុជា ជាមួយមន្ត្រីជំនាញធនាគារជាតិនៃកម្ពុជា ក្រសួងសេដ្ឋកិច្ចនិងហិរញ្ញវត្ថុ វិទ្យាស្ថានជាតិស្ថិតិ និងក្រុមប្រឹក្សាអភិវឌ្ឍន៍កម្ពុជា ក្នុងគោលបំណងពិភាក្សាពីវឌ្ឍនភាពនៃក្របខ័ណ្ឌម៉ាក្រូសេដ្ឋកិច្ចសម្រាប់កម្ពុជា និងគោលដៅអនាគតដែលក្រុមការងារចង់បាននិងត្រូវអនុត្តបន្ត ដើម្បីសម្រេចបានក្របខ័ណ្ឌម៉ាក្រូសេដ្ឋកិច្ចដែលមានលក្ខណៈស៊ីជម្រៅសម្រាប់បម្រើដល់ការសម្រេចចិត្តគោលនយោបាយរូបិយវត្ថុ គោលនយោបាយសារពើពន្ធ ព្រមទាំងគោលនយោបាយម៉ាក្រូសេដ្ឋកិច្ចនិងហិរញ្ញវត្ថុផ្សេងៗទៀត។
