១៣ កញ្ញា ២០១៧
កាលពីរសៀលថ្ងៃទី១៣ ខែកញ្ញា ឆ្នាំ២០១៧ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជាបានអនុញ្ញាតឱ្យ លោក Mathew Fox នាយកប្រតិបត្តិនៃធនាគារអភិវឌ្ឍន៍អាស៊ី ចូលជួបសម្តែងការគួរសមនិងពិភាក្សាការងារពាក់ព័ន្ធនឹងវិស័យអាទិភាពមួយចំនួននៅកម្ពុជា។
ឯកឧត្តម ទេសាភិបាល បានជម្រាបជូន លោក Mathew Fox ថា ដោយសារកម្ពុជាមានស្ថិរភាពនយោបាយនិងសុខសន្តិភាពពេញលេញ ដែលជាកត្តាដ៏សំខាន់ក្នុងការជំរុញឱ្យកម្ពុជាសម្រេចបានអត្រាកំណើនសេដ្ឋកិច្ចខ្ពស់នារយៈពេលជាងពីរទសវត្សរ៍ចុងក្រោយនេះ។ នៅឆ្នាំ២០១៧ នេះ កម្ពុជារំពឹងថាសម្រេចបានកំណើនសេដ្ឋកិច្ចរឹងមាំក្នុងអត្រា ៧% ជាមួយនឹងស្ថិរភាពម៉ាក្រូសេដ្ឋកិច្ចដោយអត្រាអតិផរណាមានកម្រិតទាបសមស្របត្រឹម ២,៣%។ ក្នុងឆមាសទី១ ឆ្នាំ២០១៧នេះ លំហូរវិនិយោគផ្ទាល់បរទេសក្នុងវិស័យធនាគារមានកំណើនប្រមាណ ៨៩% ខណៈឥណទានមានកំណើនសមស្របប្រមាណ ១៦%។ បរិយាប័ន្នហិរញ្ញវត្ថុដែលវាស់ដោយអត្រាប្រជាជនពេញវ័យកំពុងប្រើប្រាស់សេវាហិរញ្ញវត្ថុធៀបនឹងប្រជាជនពេញវ័យសរុបបានកើនដល់អត្រាប្រមាណ ៥៥%។ ឯកឧត្តមបានបន្ថែមទៀតថា ក្រោមជំនួយបច្ចេកទេសរបស់ ADB កាលពីខែមិថុនា ឆ្នាំ២០១៧ កន្លងទៅរាជរដ្ឋាភិបាលបានសម្ពោធជាផ្លូវការនូវយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០១៦-២០២៥។ ផ្អែកតាមផែនការសកម្មភាពដែលមានចែងក្នុងយុទ្ធសាស្ត្រនេះ ធនាគារជាតិនៃកម្ពុជាសម្រេចបានការងារជាច្រើនដូចជា ៖ ការធ្វើឱ្យប្រសើរឡើងនូវជំនឿទុកចិត្តនិងអន្តរការិយកម្មហិរញ្ញវត្ថុការរក្សាស្ថិរភាពវិស័យហិរញ្ញវត្ថុ ការជំរុញអភិបាលកិច្ចល្អរបស់គ្រឹះស្ថានធនាគារនិងហិរញ្ញវត្ថុ និងការធ្វើឱ្យប្រសើរឡើងនូវប្រសិទ្ធភាពនិងមុខងាររបស់ធនាគារជាតិនៃកម្ពុជា។ ឯកឧត្តម ទេសាភិបាល ក៏បានថ្លែងអំណរគុណយ៉ាងជ្រាលជ្រៅចំពោះ ADB ដែលតែងតែចូលរួមគាំទ្រនិងផ្តល់ជំនួយបច្ចេកទេសមកធនាគារជាតិនៃកម្ពុជា ក្នុងការអភិវឌ្ឍវិស័យហិរញ្ញវត្ថុ និងការកសាងសមត្ថភាពជំនាញរបស់មន្ត្រីបុគ្គលិក តាមរយៈអាហារូបករណ៍ កិច្ចប្រជុំ សិក្ខាសាលា វគ្គបណ្តុះបណ្តាលនានា ទាំងក្នុងក្របខ័ណ្ឌទ្វេភាគី និងសមាហរណកម្មសេវាហិរញ្ញវត្ថុអាស៊ាន។ ក្នុងឱកាសនោះដែរ ADB បានកោតសរសើរចំពោះកិច្ចខិតខំប្រឹងប្រែងរបស់ធនាគារជាតិនៃកម្ពុជា ក៏ដូចជា រាជរដ្ឋាភិបាលកម្ពុជាក្នុងការអភិវឌ្ឍសេដ្ឋកិច្ចឱ្យមានការរីកចម្រើនជាលំដាប់។ ADB បានប្តេជ្ញាបន្តគាំទ្រធនាគារជាតិនៃកម្ពុជា និងរាជរដ្ឋាភិបាលកម្ពុជា ដើម្បីរួមចំណែកអភិវឌ្ឍសេដ្ឋកិច្ចប្រកបដោយចីរភាព។
