១១ សីហា ២០១៧
កាលពីថ្ងៃទី៩-១១ ខែសីហា ឆ្នាំ២០១៧ ធនាគារជាតិនៃកម្ពុជា សហការជាមួយការិយាល័យជំនួយបច្ចេកទេសប្រចាំឡាវ មីយ៉ានម៉ា វៀតណាម និងកម្ពុជា របស់មូលនិធិរូបិយវត្ថុអន្តរជាតិ បានរៀបចំសិក្ខាសាលា ស្តីពី ក្របខណ្ឌម៉ាក្រូសេដ្ឋកិច្ចសម្រាប់កម្ពុជា នៅខេត្តសៀមរាប។ ចូលរួមក្នុងសិក្ខាសាលានេះ មានមន្ត្រីជំនាញ ៣៥រូប មកពីធនាគារជាតិនៃកម្ពុជា ក្រសួងសេដ្ឋកិច្ចនិងហិរញ្ញវត្ថុ វិទ្យាស្ថានជាតិស្ថិតិនៃក្រសួងផែនការ លោកស្រី Yong Sarah Zhou និងលោក Javier Arze Del Granado។ សិក្ខាសាលាបានពិភាក្សាពីវឌ្ឍនភាពនិងទស្សនវិស័យតាមវិស័យនីមួយៗ (វិស័យរូបវន្ត ក្រៅប្រទេស រូបិយវត្ថុ និងសារពើពន្ធ) ដើម្បីជាមូលដ្ឋានក្នុងការតាមដាននិងវាយតម្លៃស្ថានភាពម៉ាក្រូសេដ្ឋកិច្ចជារួម ដែលជាធាតុចូលដ៏សំខាន់ក្នុងការរៀបចំគោលនយោបាយ។ សិក្ខាសាលាក៏បានផ្តល់ឱកាសដល់មន្ត្រីជំនាញវិភាគលើសេណារីយ៉ូនានា ដូចជា ការប្រែប្រួលការនាំចេញ និងលំហូរចូលវិនិយោគផ្ទាល់បរទេស ជាដើម និងការប្រើប្រាស់គោលនយោបាយចម្បងៗសម្រាប់រក្សាកំណើននិងម៉ាក្រូសេដ្ឋកិច្ច។
