១០ សីហា ២០១៧
កាលពីព្រឹកថ្ងៃទី១០ ខែសីហា ឆ្នាំ២០១៧ ធនាគារជាតិនៃកម្ពុជាបានរៀបចំបើកវគ្គសុក្រឹតការជំនាន់ទី១២ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា ដែលមានសិក្ខាកាមចូលរួមចំនួន៦២រូប មកពីទីស្នាក់ការកណ្តាលចំនួន៤៣រូប និងសាខាធនាគារជាតិនៃកម្ពុជាចំនួន១៩រូប។ វគ្គសុក្រឹតការនេះមានគោលបំណងចែករំលែកចំណេះដឹងនិងបទពិសោធន៍ដល់មន្ត្រីបុគ្គលិកដែលទើបបានចូលបម្រើការងារនៅធនាគារជាតិនៃកម្ពុជា ទាក់ទងនឹងទស្សនវិស័យ បេសកកម្ម និងមុខងារភារកិច្ចរបស់ធនាគារជាតិនៃកម្ពុជា ជាពិសេសអំពីមុខងារភារកិច្ចស្នូល ដូចជា ការអនុវត្តគោលនយោបាយរូបិយវត្ថុ កាត្រួតពិនិត្យវិស័យធនាគារ ការអភិវឌ្ឍទីផ្សារហិរញ្ញវត្ថុនៅជុំវិញពិភពលោក និងបញ្ហាប្រឈមថ្មីៗនៅក្នុងប្រព័ន្ធធនាគារ។ ឆ្លៀតក្នុងឱកាសនោះ ឯកឧត្តមទេសាភិបាល បានផ្តាំផ្ញើឱ្យសិក្ខាកាមទាំងអស់ខិតខំត្រងត្រាប់ស្តាប់ការឧទ្ទេសនាមរបស់ថ្នាក់ដឹកនាំ និងមន្ត្រីជំនាញដោយយកចិត្តទុកដាក់ ដើម្បីទទួលយកចំណេះដឹងនិងបទពិសោធន៍ទៅអនុវត្តការងារ ឱ្យបានជោគជ័យនិងមានប្រសិទ្ធភាពខ្ពស់។
