២៥ កក្កដា ២០១៧
កាលពីថ្ងៃទី ២៥ ខែកក្កដា ឆ្នាំ២០១៧ លោកជំទាវ នាវ ច័ន្ទថាណា ទេសាភិបាលធនាគារជាតិនៃកម្ពុជា បានទទួលជួបពិភាក្សាការងារជាមួយ លោក Hiroyuki Aoki ជំនាញការជាន់ខ្ពស់ផ្នែកវិស័យហិរញ្ញវត្ថុនៃធនាគារអភិវឌ្ឍន៍អាស៊ី ។ កិច្ចប្រជុំនេះមានគោលបំណងបន្តពិភាក្សាពីវឌ្ឍភាពនៃសកម្មភាពគោលនយោបាយក្រោមអនុកម្មវិធីទី២ និងជំនួយបច្ចេកទេសក្រោមកម្មវិធីអភិវឌ្ឍន៍បរិយាប័ន្នវិស័យហិរញ្ញវត្ថុ។ រយៈពេលកន្លងមក ធនាគារអភិវឌ្ឍន៍អាស៊ីបានជួយបង្កើតនិងធ្វើបច្ចុប្បន្នកម្មយុទ្ធសាស្ត្រគោលនយោបាយអភិវឌ្ឍន៍វិស័យហិរញ្ញវត្ថុ ដែលបច្ចុប្បន្ន យុទ្ធសាស្ត្រនេះធ្វើឡើងសម្រាប់ឆ្នាំ២០១៦-២០២៥។ ផ្អែកលើយុទ្ធសាស្ត្រនេះ ធនាគារអភិវឌ្ឍន៍អាស៊ីក៏ដូចជាដែគូអភិវឌ្ឍន៍នានា បានបន្តសហការជាមួយអាជ្ញាធរពាក់ព័ន្ធ ដែលក្នុងនោះធនាគារជាតិនៃកម្ពុជាដើរ តួនាទីជាស្ថាប័នប្រតិបត្តិ។
