២០ មីនា ២០១៧
នៅរសៀលថ្ងៃទី២០ ខែមីនា ឆ្នាំ២០១៧ ឯកឧត្តម ជា ចាន់តូ អគ្គទេសាភិបាល ធនាគារជាតិនៃកម្ពុជា បានជួបពិភាក្សាការងារជាមួយប្រតិភូធនាគារធំជាងគេនៅជប៉ុន The Bank of Tokyo-Mitsubishi UFJ ដឹកនាំដោយ លោក តាកាយ៉ុស្ស៊ិ ហ្វឹតាអេ នាយកប្រតិបត្តិធនាគារ ប្រចាំតំបន់អាស៊ីនិងអូសេអានី អំពីការវិវត្តរីកចម្រើននៃវិស័យសេដ្ឋកិច្ច និងហិរញ្ញវត្ថុនៅកម្ពុជា ។
ក្នុងជំនួបពិភាក្សានេះ លោក ហ្វឹតាអេ បានសម្តែងការកោតសរសើរចំពោះការរីកចម្រើនយ៉ាងឆាប់រហ័សនៃវិស័យធនាគារ និងសេដ្ឋកិច្ចកម្ពុជាជារួម ក្រោមការដឹកនាំរបស់រាជរដ្ឋាភិបាល ដែលបានបង្កលក្ខណៈងាយស្រួល និងយកចិត្តទុកដាក់ចំពោះការវិនិយោគពីក្នុង និងក្រៅស្រុក ។ ទន្ទឹមនោះ ធនាគារ The Bank of Tokyo-Mitsubishi UFJ ក៏មានចំណាប់អារម្មណ៍យ៉ាងខ្លាំងក្នុងការពង្រីកប្រតិបត្តិការ និងទុនវិនិយោគរបស់ខ្លួនក្នុងវិស័យហិរញ្ញវត្ថុនៅកម្ពុជា ដើម្បីចូលរួមគាំទ្រដល់ការអភិវឌ្ឍសេដ្ឋកិច្ចនិងហិរញ្ញវត្ថុឱ្យកាន់តែរីកចម្រើន ក៏ដូចជាទាក់ទាញវិនិយោគិនពីប្រទេសជប៉ុនមកកម្ពុជាឱ្យកាន់តែច្រើន ។
ជាកិច្ចឆ្លើយតប ឯកឧត្តម ជា ចាន់តូ អគ្គទេសាភិបាល ធនាគារជាតិនៃកម្ពុជា មានសេចក្តីរីករាយ និងវាយតម្លៃខ្ពស់ចំពោះការរួមចំណែករបស់ The Bank of Tokyo-Mitsubishi UFJ នៅកម្ពុជា ហើយក៏ស្វាគមន៍ចំពោះចំណាប់អារម្មណ៍របស់ធនាគារក្នុងការពង្រីកប្រតិបត្តិការនិងការវិនិយោគរបស់ខ្លួននៅកម្ពុជា ។
ធនាគារ The Bank of Tokyo-Mitsubishi UFJ ជាធនាគារដ៏ធំជាងគេនៅប្រទេសជប៉ុន និងជាធនាគារមួយក្នុងចំណោមធនាគារធំបំផុតរបស់ពិភពលោក ដែលមានដើមទុនប្រមាណ ១៥ ប៊ីលានដុល្លារអាមេរិក មានសាខាក្នុងស្រុកនិងបរទេសជាង ៨០០ និងបុគ្គលិកសរុបជាង ៣៥ពាន់នាក់ ។ វត្តមានរបស់ធនាគារធំជាងគេរបស់ជប៉ុនមួយនេះ ក៏បានបង្ហាញពីជំនឿទុកចិត្តរបស់វិនិយោគិនចំពោះស្ថានភាពសេដ្ឋកិច្ចកម្ពុជាបច្ចុប្បន្ន និងទស្សនវិស័យនាពេលខាងមុខ ។
