២៣ កុម្ភៈ ២០១៧
កាលពីព្រឹកថ្ងៃទី២៣ ខែកុម្ភៈ ឆ្នាំ២០១៧ ធនាគារជាតិនៃកម្ពុជា បានរៀបចំកិច្ចប្រជុំមួយក្រោមអធិបតីភាព របស់ លោកជំទាវ អ៊ុក ម៉ាលី ទេសាភិបាលរង ធនាគារជាតិនៃកម្ពុជា តំណាងដ៏ខ្ពង់ខ្ពស់របស់ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា ដោយមានការចូលរួមពីតំណាង គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ និងប្រតិបត្តិករឥណទានជនបទ ប្រមាណ៣០០នាក់ ។ គោលបំណងនៃកិច្ចប្រជុំនេះគឺ ១). ផ្សព្វផ្សាយសេចក្តីថ្លែងការណ៍រួមរវាងធនាគារជាតិនៃកម្ពុជានិងក្រសួងសេដ្ឋកិច្ចនិងហិរញ្ញវត្ថុ កាលពីថ្ងៃទី១៦ ខែកុម្ភៈ ឆ្នាំ២០១៧ និង ២). ការអនុវត្តតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ទាក់ទងនឹងការផ្សព្វផ្សាយខ្លឹមសារ “គ្រឹះស្ថានមីក្រូហិរញ្ញវត្ថុទាំងអស់នៅកម្ពុជាជារបស់ឯកជន មិនមែនជារបស់រដ្ឋ” ការបន្ថែមពាក្យ “ឯកជន” និងការប្តូរនិមិត្តសញ្ញា (Logo) របស់គ្រឹះស្ថានធនាគារនិងហិរញ្ញវត្ថុ ។ ធនាគារជាតិនៃកម្ពុជា ក៏បានផ្តល់ Poster សេចក្តីថ្លែងការណ៍រួមដល់តំណាងគ្រឹះស្ថានដែលបានចូលរួម ដើម្បីបិតផ្សាយនៅទីស្នាក់ការកណ្តាល និងសាខារបស់ខ្លួននៅទូទាំងប្រទេស ។
