០៥ កញ្ញា ២០១៦
ធនាគាររបស់ប្រទេសចិនគ្រោងបើកសាខារបស់ខ្លួនចំនួន២បន្ថែមទៀតមួយនៅខេត្តសៀមរាប និងនៅខេត្តព្រះសីហនុបន្ទាប់ពីធនាគារធំនៅក្រុងភ្នំពេញ ដើម្បីពង្រីកវិសាលភាពប្រតិបត្តិការ ខណៈដែលសេដ្ឋកិច្ចកម្ពុជាកាន់តែមានការរីកចម្រើននោះ។ គម្រោងនៃការពង្រីកសាខាបន្ថែមរបស់ធនាគារចិននៅខេត្តសៀមរាប និងខេត្តព្រះសីហនុ ទាំងពីរនេះត្រូវបានលោក Cheng Si Qing អនុប្រធានក្រុមប្រឹក្សាភិបាល និងជានាយកគ្រប់គ្រងរបស់ធនាគារចិនលីមីធីត ប្រចាំប្រទេសចិនបញ្ជាក់ឲ្យដឹងនៅរសៀលថ្ងៃទី៥ ខែកញ្ញា ឆ្នាំ២០១៦ ខណៈដែលលោកបានដឹកនាំប្រតិភូរបស់ខ្លួនចូលជួបពិភាក្សាការងារជាមួយ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា ។ នៅក្នុងឱកាសនោះលោក Cheng Si Qing បានបញ្ជាក់ឲ្យដឹងដែរថា ការសម្រេចចិត្តបើកសាខារបស់ធនាគារចិនបន្ថែមនៅខេត្តសៀមរាប និង ខេត្តព្រះសីហនុនៅពេលខាងមុននេះគឺដោយសារពិនិត្យឃើញថាវិស័យធនាគារ ពិសេសសេដ្ឋកិច្ចកម្ពុជានៅក្នុងរយៈពេលប៉ុន្មានឆ្នាំនេះគឺមានការរីកចម្រើនខ្លាំង ទោះបីជាស្ថានភាពសេដ្ឋកិច្ចពិភពលោក មានការប្រែប្រួល ពិសេសគឺការចាកចេញរបស់ចក្រភពអង់គ្លេសពីសហភាពអឺរ៉ុប យ៉ាងណាក៏ដោយក៏វិស័យសេដ្ឋកិច្ចកម្ពុជានៅតែរក្សាបាននូវកំណើនមួយដ៏ល្អប្រសើរដដែល។ ហើយបើប្រៀបធៀប កាលពីទស្សវត្សរ៍៩០ ដែលលោកបានមកកាន់កម្ពុជាជាលើកទីមួយនោះគឺខុសគ្នាឆ្ងាយមិននឹកស្មានដល់ ។
ទាក់ទងការបើកសាខារបស់ធនាគារចិននៅខេត្តសៀមរាប និងខេត្តព្រះសីហនុនោះ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជាបានសម្ដែងការស្វាគមន៏និងគាំទ្រយ៉ាងពេញទំហឹង ។ ជាមួយនេះដែរឯកឧត្ដម ជា ចាន់តូ បានចាត់ទុកការសម្រេចចិត្តរបស់ធនាគារចិន នាពេលនេះថាជាការសម្រេចចិត្តដ៏ត្រឹមត្រូវព្រោះថាបច្ចុប្បន្ននេះកម្ពុជាមានការវិនិយោគពីបរទេសច្រើន ពិសេសអ្នកវិនិយោគមកពីប្រទេសចិន ។ ហើយតាមរយៈការបើកសាខាបន្ថែមនេះក៏ជាការរួមចំណែកដ៏មានប្រសិទ្ធភាពក្នុងការធ្វើឲ្យសេដ្ឋកិច្ចកម្ពុជាកាន់តែរឹងមាំ និងរីកចម្រើន ក្នុងនោះរួមទាំងវិស័យធនាគារផងដែរ ។ ឯកឧត្តម ទេសាភិបាល ធនាគារជាតិនៃកម្ពុជាបានបញ្ជាក់ឲ្យប្រតិភូធនាគារចិនលីមីធីតបានដឹងដែរថា កត្តាដែលធ្វើឲ្យវិស័យធនាគារនៅកម្ពុជាមានការវិវឌ្ឍរីកចម្រើនដូចបច្ចុប្បន្ននេះគឺអាស្រ័យដោយគោលនយោបាយបើកចំហររបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន ពិសេសទៀតនោះកត្តាសន្តិសុខនិងស្ថិរភាពខាងនយោបាយ ។ នៅក្នុងឱកាសនោះដែរលោក Cheng Si Qing អនុប្រធានក្រុមប្រឹក្សាភិបាល និងជានាយកគ្រប់គ្រងរបស់ធនាគារចិនលីមីធីត ប្រចាំប្រទេសចិនក៏បានអញ្ជើញឯកឧត្តម ជា ចាន់តូ ឲ្យទៅបំពេញទស្សនកិច្ចនៅទីក្រុងប៉េកាំង និងទីក្រុងហុងកុងដើម្បីផ្លាស់ប្ដូរបទពិសោធន៏គ្នានិងដើម្បីពង្រឹងកិច្ចសហប្រតិបត្តិការលើវិស័យធនាគាររវាងប្រទេសទាំង២ឲ្យបានកាន់តែល្អប្រសើរទ្វេរថែមទៀត ។
