២៥ វិចិ្ឆកា ២០១៥
កាលពីថ្ងៃទី២៥ ដល់ ២៧ ខែវិច្ឆិកា ឆ្នាំ២០១៥ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានដឹកនាំគណៈប្រតិភូ ចូលរួមក្នុងសន្និសីទនិងសិក្ខាសាលាជាន់ខ្ពស់ថ្នាក់ទេសាភិបាលនៃធនាគារកណ្តាលស៊ាសិន លើកទី ៥១ ក្រោមប្រធានបទ “ការលើកកម្ពស់ភាពធនមាំនៃសេដ្ឋកិច្ចទៅនឹងការផ្លាស់ប្តូរបរិស្ថានសកល” និងកិច្ចប្រជុំក្រុមប្រឹក្សាទេសាភិបាលធនាគារកណ្តាលស៊ាសិន លើកទី ៣៥ ដែលត្រូវបានរៀបចំឡើងដោយធនាគារកណ្តាលហ្វីលីពីន នៅទីក្រុងម៉ានីល ប្រទេសហ្វីលីពីន ។ កិច្ចប្រជុំនេះក៏មានការចូលរួមពីសំណាក់ លោក Mitsuhiro Furusawa នាយករងគ្រប់គ្រងមូលនិធិរូបិយវត្ថុអន្តរជាតិ លោក Takehiko Nakao ប្រធានធនាគារអភិវឌ្ឍន៍អាស៊ី សាស្ត្រាចារ្យ Robert C. Merton ម្ចាស់ពានរង្វាន់ណូបែលសេដ្ឋកិច្ច និងថ្នាក់ដឹកនាំនៃស្ថាប័នហិរញ្ញវត្ថុអន្តរជាតិដទៃទៀត ។ សន្និសីទនិងសិក្ខាសាលានេះមានគោលបំណងផ្តល់ឱកាសជូនទេសាភិបាលធនាគារកណ្តាលស៊ាសិន (South Est Asian Central Banks) ដែលបច្ចុប្បន្នមានសមាជិកចំនួន ២០ ប្រទេស នៅក្នុងតំបន់អាស៊ីអាគ្នេយ៍ បានជួបជុំពិភាក្សាផ្លាស់ប្តូរយោបល់ពីស្ថានភាពសេដ្ឋកិច្ចសកលនិងតំបន់ កិច្ចសហប្រតិបត្តិការ និងគោលនយោបាយសំខាន់ៗក្នុងការអភិវឌ្ឍវិស័យហិរញ្ញនៅក្នុងតំបន់ ។ ទន្ទឹមនេះ កិច្ចប្រជុំក្រុមប្រឹក្សាទេសាភិបាលធនាគារកណ្តាលស៊ាសិនក៏បានពិនិត្យមើលទៅលើការរីកចម្រើននៃសកម្មភាពរបស់មជ្ឍមណ្ឌលស៊ាសិននាឆ្នាំ២០១៥ នេះ និងបានអនុមត្រនូវផែនការសកម្មភាព ឆ្នាំ២០១៦ សំដៅចូលរួមចំណែកក្នុងការពង្រឹងនិងកសាងសមត្ថភាពជំនាញលើប្រតិបត្តិការធនាគារកណ្តាលរបស់មន្ត្រីធនាគារកណ្តាលជាសមាជិកទាំងអស់ ។ ជំនួបទាំងនេះ ក៏បានពង្រឹងនិងពង្រីកកិច្ចសហប្រតិបត្តិការទ្វេភាគីរវាងថ្នាក់ដឹកនាំធនាគារកណ្តាលជាសមាជិកឱ្យកាន់តែរឹងមាំថែមទៀតផងដែរ ។
